Foto: egemen.kz
Semeide ýchaskelik politseidiń kólikterin órtegen er azam muny ne úshin jasaǵany belgili boldy, dep habarlaidy Ult.kz.
Abai oblysynyń Politsiia departamenti 2026 jylǵy 25 qańtarda «Iýnost» shaǵynaýdanyndaǵy ákimshilik aýmaqty aralaý barysynda ýchaskelik politsiia inspektorlary buryn sotty bolǵan, 66 jastaǵy jergilikti turǵyndy anyqtaǵanyn habarlaidy. Atalǵan azamat alkogoldik mas kúide bolǵan, syrt kelbeti uqypsyz, qoǵamdyq tártipti buzyp, agressivti ári adekvatty emes minez-qulyq tanytqan.
Ol ýchaskelik politsiia pýnktine jetkizilip, zańda belgilengen tártippen qoǵamdyq orynda alkogoldik mas kúide júrgeni úshin ákimshilik hattama toltyrylǵan. Qujattar rásimdelgennen keiin er adam týystaryna tapsyrylyp, bosatylǵan.
Politsiia qyzmetkerleriniń zańdy áreketterimen kelispegen azamat keiinnen qasaqana zańǵa qaishy áreketterge baryp, ýchaskelik politsiia inspektorlaryna tiesili, ýchaskelik pýnkt mańynda turǵan eki avtokólikti benzin quiyp órtegen.
Órt saldarynan kólik quraldaryna iri materialdyq zalal keltirildi.
"Atalǵan fakti boiynsha qylmystyq is qozǵaldy. Kúdikti ustalyp, ýaqytsha ustaý izoliatoryna qamaldy, jasaǵan áreketin tolyq moiyndady. Qazirgi ýaqytta oǵan qatysty qamaýda ustaý túrindegi bultartpaý sharasyn tańdaý máselesi qaralýda.
Tergeý qorytyndysy boiynsha onyń áreketterine qoldanystaǵy zańnama talaptaryna sáikes quqyqtyq baǵa beriletin bolady", - delingen habarlamada.
