Cemei shaharyndaǵy Nevzorovtar otbasy atyndaǵy beineleý óneri murajaiynda XVII-XVIII ǵasyrlardaǵy Batys Eýropanyń birqatar grafikalyq jumystary saqtalǵan. Bul baǵa jetpes bailyqtyń ishinde, ásirese, graviýralyq sýretter tańǵaldyrmai qoimaidy.
Graviýrany ádette qatty zattardyń betine (ol metall, aǵash nemese tas bolýy múmkin) salady. Sodan keiin onyń betine boiaý jaǵyp, basý arqyly birneshe túrin alady. Áigili gollandyq sýretshi Rembrandttyń dál osyndai ádispen salynǵan «Kresten túsirip alý» kartinasy murajaidyń grafikaǵa arnalǵan zalynyń tórinde tur.
Jalpy, HVII-XVIII ǵasyrlarda eýropalyq sýretshiler táýrattyq taqyryptarǵa, Injildegi oqiǵalarǵa arnalǵan sýretterdi kóptep salǵany belgili. Ásirese, Isa paiǵambardy kresten sheship alý siiaqty sátterdi kóptep beinelegen. Sondai-aq, grek ańyzdaryna boilap, Amýr, Zevs qudailaryn keiiptegen. Bul rette Rembrandt Harmens Van Reinniń kartinasyn italiialyq jumystarmen salystyrýǵa bolady. Máselen, gollandyq qylqalam sheberiniń týyndysynda Isanyń álsiz haldegi kúii beinelense, italiialyq sýretshiler Isany barlyq kúsh-qýatyn kórsete otyryp beineleidi. Iaǵni, Rembrandt oqiǵany shynaiy beineleýimen, adamdardyń júzindegi muń, qaiǵy-qasiret tabyn jetkize bilýimen, tipti, oisyzdyqty, nemquraidylyqty, súlesoqtyqty da aita bilýimen alǵa ozady. Kartinada tipti, aspannan bozǵyltym sáýleniń túsip turǵanyn kórýge bolady. Osy bir XVII ǵasyrǵa (1633 jyly salynǵan) tiesili kartinaǵa qarap otyryp, sol zamandaǵy shynaiylyqty jaza alǵan Rembrandttyń sheberligine tánti bolasyz.
− Isany kresten túsirip alý óte keń taraǵan taqyryp. Bul týyndyny bizge biraz jyldar buryn Reseidiń áigili A.Pýshkin atyndaǵy beineleý óneri mýzeii syiǵa bergen bolatyn. Jalpy, graviýranyń keskindeme nemese jai týyndydan ereksheligi, bir graviýranyń birneshe kóshirmesin ǵana jasaýǵa bolady. Iaǵni, alǵashqy úsh-tórt kóshirmesi anyǵyraq shyǵatyndyqtan óte qundy, túpnusqa sanalady. Al qalǵan nusqalarynyń boiaýy tez ońyp ketedi. Sondyqtan Rembrandttyń bul týyndysy alǵashqy túpnusqaǵa jatatyn óte qymbat jádigerlerdiń biri, − deidi mýzei qyzmetkeri Gúljan Jákeeva.
Dýman ANASh,
«Egemen Qazaqstan» gazeti
