Semei qalasynda 10 myńǵa jýyq adamǵa koronavirýsqa qarsy vaktsina salyndy, dep habarlaidy "Ult aqparat".
Osy jyldyń 1 aqpanynan bastap elimizde COVID-19 infektsiiasyna qarsy erikti vaktsinatsiia bastalǵan bolatyn. Búgingi tańda Semei turǵyndary arasynda ekpe saldyryp jatqandar az emes. Bul jaily onlain formatta ótken baspasóz máslihatynda shahar ákiminiń orynbasary Aidar Sadyrbaev málim etti.
«Qala boiynsha 10 myńǵa jýyq adam reseilik «Spýtnik V» vaktsinasynyń birinshi komponentin aldy. Erteń QR Densaýlyq saqtaý ministrliginiń bekitilgen kestesine sáikes, vaktsinanyń kezekti dozasynyń jetkizilýin kútip otyrmyz. Vaktsina alǵysy kelgen azamattar turǵylyqty mekenjaiy boiynsha emhanaǵa nemese Egov portaly arqyly ótinish berý arqyly tirkele alady. Qaýipti dertti jeńýdiń negizgi amaly – vaktsina ekenin qaperde ustaiyq», – dedi ol.
Aidar Sadyrbaevtyń aitýynsha, Semeide vaktsinatsiia pýnkteri emhanalar men iri kásiporyndarda jumys istep tur.
