Foto: Atyraý oblystyq PD baspasóz qyzmeti
Semeide er adam 4 jasar búldirshinniń denesin jol boiyndaǵy ájethana shuńqyryna laqtyryp ketken. Politsiia tergeýdi bastady.
Jantúrshigerlik oqiǵa týraly "NeMolchiKZ" qoǵamdyq qory habarlady. Qor jetekshisiniń aitýynsha, anasy búldirshindi kútýshi áielge qaldyrǵan.
"Al alyp ketýge kelgende bala kútýshi "búldirshin tanysymnyń úiinde" dep aldaǵan. Shyn máninde bala ol kezde qaitys bolǵan. Oqiǵany jasyrý úshin bala kútýshiniń kúieýi búldirshinniń denesin sómkege salyp, jol boiyndaǵy ájethanaǵa laqtyryp ketken", - dep jazdy Dina Tańsári.
Qaiǵyly oqiǵa qyrkúiek aiynyń basynda bolǵan.
Abai oblysy politsiia departamenti tórt jasar balanyń qaitys bolý faktisi boiynsha sotqa deiingi tergeý júrip jatqanyn málimdedi.
"Kúdikti ustaldy, oǵan qatysty qamaýda ustaý túrindegi bultartpaý sharasy tańdaldy.
Qylmystyq is boiynsha birqatar sot-meditsinalyq saraptama taǵaiyndaldy, bolǵan oqiǵanyń barlyq mán-jaiyn anyqtaýǵa baǵyttalǵan tergeý-jedel is-sharalar kesheni júrgizilip jatyr.
Qylmystyq isti tergeý Abai oblysy politsiia departamenti men prokýratýra basshylyǵynyń erekshe baqylaýynda.
Qylmystyq-protsestik kodekstiń 201-babynyń 1-bóligine sáikes sotqa deiingi tergep-tekserýdiń ózge derekteri jariia etilýge jatpaidy" - delingen habarlamada.
