Qazaqtyń rýhani astanasy - Semei shaharynda Ult kósemi Álihan Bókeihanovtyń eskertkishi ashyldy, dep habarlaidy "Ult aqparat".
Eskertkishtiń ashylý saltanyna jinalǵan halyqpen birge Parlament májilisiniń depýtaty, «Aq jol» demokratiialyq partiiasynyń tóraǵasy Azat Perýashev, «Egemen Qazaqstan» gazeti AQ basqarma tóraǵasy, Halyqaralyq Túrki akademiiasynyń prezidenti Darhan Qydyráli, Gýmilev atydaǵy Eýraziia Ulttyq ýniversitetiniń professory Ǵarifolla Esim men prorektory Dihan Qamzabekuly, ShQO ákiminiń birinshi orynbasary Nurymbet Saqtaǵanov, Semei qalasynyń ákimi Ermak Sálimov t.s.s. qatysty. Ult kóseminiń rýhyna taǵzym etýge jinalǵan belgili jazýshylar men aqsaqaldar izgi tilekterin bildirdi.
«Bul eskertkish óskeleń urpaqtyń bolashaǵy úshin, elimizdiń bostandyǵy úshin jandaryn pida etken kósemderdiń rýhtaryna taǵzym etetin, Táýelsizdiktiń qandai uǵym ekenin túsinetin, bostandyqtyń ne ekenin biletin adamdardyń kieli ornyna ainalary sózsiz», - dedi oblys ákiminiń orynbasary Nurymbet Saqtaǵanov. Onyń aitýynsha, Elbasynyń tapsyrmasyna sáikes Alash qozǵalysynyń 100 jyldyǵyna orai úlken sharalar uiymdastyrylǵan. Al, eskertkish jobasyn osy sharalarǵa jaýapty respýblikalyq komissiia qabyldaǵan. «Sol komissiianyń sheshimimen Qazaqstan Sýretshiler odaǵynyń múshesi, músinshi Baqytbek aǵamyzdyń eskizi qabyldanyp, búgin eskerktishterdiń ashylýyna kýá bolyp otyrsyzdar. Men búgin tarihi ádildiktiń jeńgen kúni dep oilaimyn», - dedi Nurymbek Saqtaǵanov.
Sonymen birge, eskertkishtiń ashylý saltanatynda quttyqtaý sóz sóilegen qala ákimi Ermak Sálimov búgingi kún ulttyń rýhyn asqaqtatý turǵysynda asa mańyzdy kún ekenin atap ótti. Onyń aitýynsha, búgingi kún arman aqiqatqa ainalǵan, Alashtyń qyrany tuǵyryna qonǵan kún. Aita keterligi, QR Mádeniet jáne sport ministrligi Alashtyń 100 jyldyǵyn qalai toilaý kerektigi jóninde respýblikalyq joba qabyldaǵan. Semeide osy joba arqyly barlyq josparlanǵan sharalar júzege asatyn boldy. Osy rette Álihan Bókeihanovqa arnalǵan eskertkishtiń resmi ashylǵannan keiin, Shákárim atyndaǵy memlekettik ýniversitette ǵylymi-tájirbielik konferentsiianyń ótkizilmek. Sonymen birge, Alash qairatkerlerine arnalǵan jańa ekspoziiatsiialyq kórme zalynyń Abai mýzeiiniń bóliminde saltanatty túrde tusaýy kesilmek.
