Semeidiń ziialy qaýym ókilderi Qaraǵaily yqsham aýdanyndaǵy ataýsyz kóshege Nursultan Nazarbaevtyń esimin berý jáne osyndaǵy mádeni-sport keshenin «Elbasy Arena» dep ataýdy usyndy, dep habarlaidy "Ult aqparat".
Semei qalalyq máslihatynda ziialy qaýym ókilderi, ataqty sportshylar, eńbek sińirgen qairatkerler, ardagerler, ÚEU, BAQ ókilderi, eriktiler qozǵalysynyń belsendileri, jastar men iri kásiporyndar jetekshilerinen quralǵan bastamashyl toptyń haty qaraldy. Ol hatta Qaraǵaily yqsham aýdanyndaǵy ataýsyz kóshege Nursultan Nazarbaevtyń esimin berý jáne osyndaǵy mádeni-sport keshenin «Elbasy Arena» dep ataý usynylǵan.
Atalmysh bastama "Elbasynyń memleketti qalyptastyrýdaǵy airyqsha róline jáne QR Táýelsizdiginiń 30 jyldyǵyna orai" kóterilip otyr. Másele qalalyq máslihattyń turaqty komissiiasynyń qaraýyna shyǵarylyp, oǵan 10 myńnan astam adam onlain formatta qatysty.
Qatysýshylar pikirlerin nazarǵa ala otyryp, depýtattar osy máseleni qalalyq máslihat sessiiasyna shyǵarýdy usyndy.
Buǵan deiin BAQ betterinde bul bastamany balýan ári qalalyq máslihat depýtaty Aibek Nuǵymarov kótergeni aitylǵan edi. Ol basylymdarǵa bergen suhbatynda "hatqa qaladaǵy barlyq belsendi qol qoidy" dedi.
«Abai-Arena» sport keshenine Nazarbaev esimin berý týraly usynys BAQ pen jelide qyzý talqyǵa túsýde. Kópshilik bul usynysqa óz narazylyqtaryn bildirip jatyr. Jurt ishinde "jaǵympazdyq pen bassyzdyqtyń sheti men shegi joq pa?" deitinder de bar.
Al búgin Nursultan Nazarbaevtyń baspasóz hatshysy Aidos Úkibai Twitter-de: «Áleýmettik jeliler men BAQ-ta ShQO belsendileriniń «Abai arena» stadionynyń ataýyn ózgertý týraly usynysy talqylanýda. Elbasy árdaiym ózine qatysty mundai «qurmet-qoshemetke» qarsy. N.Nazarbaevtyń pikirinshe, stadion qazaqtyń uly aqyny ári filosofynyń atynda qalýǵa tiis», - dep jazdy.
BAQ: «Dei turǵanmen, Nursultan Nazarbaevtyń ózi qyzmettik karerasynyń alǵashqy jyldary jeke tulǵany erekshe ulyqtaý deitin alashapqyn, belsendilikti synaityn», - dep jazady.
Mysaly, 2017 jyly Prezidenttiń BAQ ókilderimen kezdesýi barysynda jýrnalist Gúlnár Bajkenova: «Sońǵy ýaqytta sizdiń qurmetińizge óleńder jazylyp, kino túsirilip, eskertkishter qoiylyp jatyr, depýtattar da túrli usynystar joldap jatyr. Konstitýtsiianyń 91-babyn ózgertý arqyly tuńǵysh prezidenttiń mártebesin bekitip te qoidy. Meniń saýalym qarapaiym ǵana: Siz buǵan qalai qaraisyz? Sizge bul kerek pe? Álde munyń bári solardy jasap jatqan adamdarǵa qajet pe?», - dep suraǵan.
«Bir sózben ǵana aita alamyn: Maǵan mundai nárseler kerek emes. Men bul týraly únemi ashyq aityp júrmin», - degen Nazarbaev Mark Avreliidiń «Eskertkish soǵý arqyly, keler urpaq seni esine alady dep oilama», degen sózin mysal etken.
«Kezinde Leninniń, Stalinniń eskertkishin shýyldap qoldaǵandar qazir ne boldy?.. Sol qoldaǵan adamdar álgi tulǵalardy ózderi qulatyp tastady. Keiin prezidenttikten ketken kezde, men keler urpaqtyń sheshimine áser ete almaityn bolamyn», - degen.
Qazaqstandy otyz jyldai basqarǵan Nazarbaev eki jyl buryn prezidenttikten ketken. Biraq ol Qaýipsizdik keńesiniń jáne biliktegi "Nur Otan" partiiasynyń tóraǵasy retinde bilikke yqpalyn saqtap qaldy.
Aita keteiik, qazirdiń ózinde Almaty, Aqtaý, Qaraǵandy, Oral, Óskemen, Shymkent, Qostanai, Kókshetaý, Pavlodar qalalarynda Nursultan Nazarbaev atyndaǵy kósheler bar. Al Prezident Toqaev el tizginin ustaǵan sátte-aq, ant qabyldap bolysymen, Memleket astanasyna Nursultan Nazarbaevtyń esimin berý kerek degen usynys aitqan edi. Keiin Astana qalasy edel-jedel Nur-Sultan qalasy bolyp ózgergen.
Sondai-aq, elimizde birneshe nysan birinshi prezidenttiń esimimen atalady. Halyqaralyq áýejai, saiabaqtar men mektepter t.b. Nursultan Nazarbaev kósheleri men eskertkishteri elimizden tys, shet memleketterde de bar.
