Májilis depýtaty Baqytbek Smaǵul Semei poligonynda áskeri boryshyn ótegenderdiń túitkildi máseleleri jóninde QR Premer-Ministriniń orynbasary Eraly Toǵjanovtyń atyna saýal joldady, dep habarlaidy QazAqparat.
«Bizdiń depýtattyq saýal joldaýymyzǵa Semei iadrolyq synaq poligonynyń saldarynan zardap shekken ardagerlerdiń kóptegen ótinishi negiz boldy. Qazir osy iadrolyq synaqtan zardap shekkenderdiń ishinde aýrýǵa shaldyqqan azamattardyń sany artýda, olar – ásirese urpaqtan-urpaqqa beriletin qaterli onkologiialyq, júrek-qan tamyrlary aýrýlary. Alaida, memleket tarapynan osy azamattarǵa jeńildikter men járdemaqylar berý máselesi búgingi kúnge deiin oń sheshimin tappai otyr», - dedi depýtat Májilistiń jalpy otyrysynda.
Onyń aitýynsha, másele áskeri boryshyn óteý kezinde Semei poligonyndaǵy iadrolyq qarý synaqtarynan zardap shekken Qazaqstan Respýblikasynyń azamattaryna, asa qaýipti bólimshe ardagerlerine qatysty. Qorǵanys ministrliginiń málimetinshe, Semei iadrolyq synaq poligonynda áskeri qyzmet (onyń ishinde merzimdi) ótkergen 9646 adam bar.
«Ardagerler týraly» QR Zańynyń 6-babyna sáikes jeńildikter boiynsha Uly Otan soǵysynyń ardagerlerine teńestirilgen ardagerler qataryna iadrolyq synaqtarǵa tikelei qatysqan adamdar jatady. Biraq, iadrolyq synaqtyń zardaptaryna tikelei ushyraǵan sol kezdegi áskeri boryshyn óteýshi tulǵalar bul tizimge jatpaidy. Sebebi, osy Zańnyń 9-babyna sáikes, Ardagerlerdiń mártebesi iadrolyq synaqtarǵa tikelei qatysýdy rastaityn anyqtamalardyń, áskeri biletterdiń jáne ózge de qujattardyń, jaralaný, múgedektik týraly anyqtamalardyń, sot-meditsinalyq qorytyndylardyń negizinde belgilenedi. Alaida, joǵaryda atalǵan ardagerlerdiń áskeri biletterinde áskerde bolǵan ýaqyty men bólimshe ataýy ǵana kórsetiledi, al tikelei iadrolyq synaqqa qatysqandyǵy týraly aqparat berilmeidi», - dep túsindirdi B. Smaǵul.
Bul másele boiynsha Qorǵanys ministrligi «Azamattardyń asa qaýipti bólimsheleriniń is-qimyldaryna tikelei qatysýy Resei Federatsiiasy Qorǵanys ministrliginiń Ortalyq muraǵatynyń anyqtamasymen rastalady» dep resmi málimdeidi.
«Bul talaptyń oryndalmaityny belgili. Nátijesinde, iadrolyq synaqtarǵa tikelei qatysqan tulǵalarǵa beriletin arnaýly memlekettik járdemaqyny alý jóninde Eńbek jáne halyqty áleýmettik qorǵaý ministrligine júgingen ótinish berýshiler uzaq jyldar boiy anyqtama tapsyrý týraly jaýaptar alyp keledi. Bul rette, Eńbek jáne halyqty áleýmettik qorǵaý ministrligi men Qorǵanys ministrliginiń birlesken is-áreketi arqyly qajetti málimetter alýdyń qolaily mehanizmderin ázirleýge bolar edi. Alaida, ýákiletti organdar jyldar boiy túrli sebeptermen máseleni túbegeili sheshýden bas tartýda. Joǵaryda baiandalǵannyń negizinde, Eraly Luqpanuly (QR Premer-Ministriniń orynbasary Eraly Toǵjanov – red.) sizden asa qaýipti bólimshelerdiń ardagerlerine qatysty áleýmettik ádilettilikti qalpyna keltirý boiynsha jedel sharalar qabyldaýyńyzdy suraimyz», - dep saýal joldady Májilis depýtaty.
