Kezinde Semei iadrolyq synaq poligonynda áskeri mindetin ótegen qazaqstandyq sarbazdar, olarǵa «ardager» mártebesin berip, áleýmettik jaǵdai jasaýdy talap etip otyr, dep habarlaidy QazAqparat.
«Búgin elimizdiń ár óńirinen Semei poligonynda áskeri mindetin ótegen sarbazdar bas qosyp otyrmyz. Jinalýdaǵy maqsatymyz – Úkimetke, quzyrly organdarǵa únimizdi jetkizgimiz keledi. Biz kezinde Semei poligonynda áskeri mindetin ótegen sarbazdarǵa «ardager» arnaiy mártebesin berse eken deimiz. Biz 2 jyl boiy Semei poligony aýmaǵynda áskeri boryshymyzdy ótedik. Tiisti deńgeide kóńil bólinip, memleket tarapynan qajetti áleýmettik kómek kórsetilýin talap etemiz.
Mysaly, Chernobylda bolǵan mamandarǵa 2 kún bolsa da, tiisti deńgeide áleýmettik tólemderdi óteidi. Al biz 2 jyl ómirimizdi Semei poligonynda ótkizdik. Búginde Semeide áskeri boryshyn ótegenderdiń aldy 70-te, arty 50 jasqa keldi», - QR Semei iadrolyq synaq poligony erekshe táýekel etýshiler bóliminiń ardagerleri men múgedekteri birlestiginiń tóraǵasy Erjan Dúisenbaev.
Onyń aitýynsha, Semei poligonynda áskeri mindetin ótegen jandar osyǵan deiin de quzyrly organdarǵa talap-tilekterin jetkizgen.
«Kóbisiniń densaýlyǵy syr berip jatyr. Jas kelgen saiyn ońai emes, ońaltýdy talap etedi. Ákimdik, ministrlikterge habarlasqanymyzda arnaiy jumys toby bar, máseleni qarastyryp jatyrmyz degen jaýap aldyq. Búgingi sharaǵa biraz óńirden ókilder kelip otyr. Qorǵanys, Eńbek jáne halyqty áleýmettik qorǵaý, Densaýlyq saqtaý ministrligine arnaiy hat joldap, búgingi jiynǵa shaqyrdyq. Arnaiy márteden bólek, áleýmettik jaǵdai jasalsa deimiz. Keibir óńirde arnaiy áleýmettik tólem beriledi, al kei aimaqta múldem eshteńe tólenbeidi. Nege bulai? Zań ortaq emes pe?», - deidi ol.
Sondai-aq, biyl aqpanda Semei poligonynda áskerde bolǵan jandar birigip respýblikalyq deńgeide birlestik qurǵan eken.
