«Semei ormany» rezervatynda órtengen orman aǵashtaryn tazartý jumystary biyl 15 qańtardan bastap rezervattyń óz kúshterimen bastaldy. Bul týraly dúisenbi kúni Májiliste ótken Úkimet saǵatynda QR Ekologiia jáne tabiǵi resýrstar ministri Erlan Nysanbaev málimdedi, dep habarlaidy "Ult aqparat".
"Jumystyń úlken kólemin (6 mln.tekshe m.) eskere otyryp, osy jumystarǵa Orman sharýashylyǵy jáne janýarlar dúniesi komitetiniń rezervatqa jaqyn ornalasqan tabiǵat qorǵaý mekemelerin jumyldyrý josparlanýda" - dedi ministr.
Respýblikanyń ońtústik óńirleriniń ákimdikterine jáne orman qorǵaý mekemelerine osy jumystarǵa jumyldyrý, sondai-aq alynǵan súrekti daiyndaýǵa jáne óńdeýge múddeli kásipkerlerdi tartý úshin usynystar joldandy.
Anyqtama úshin: kásipkerlerge órtengen súrek bólikterinen aǵash daiyndaý jumystary «Semei ormany» rezervaty ótkizetin aýktsion negizinde beriletin bolady.
Bastapqy baǵany tekshe metr úshin 10300 myń teńgege belgileý kózdelip otyr, oǵan kóbik boiynsha aqy men aǵash kesýshilerdi bólýge arnalǵan shyǵyndar kiredi.
Abai oblysynyń aýmaǵynda týyndaǵan tótenshe jaǵdaidyń saldaryn joiý úshin ministrlik tiisti Jol kartasyn bekitti.
Jol kartasynda órtten búlingen aýmaqty orman patologiialyq tekserý jónindegi is-sharalardy júrgizý jáne keiinnen monitoring júrgizý, qajet bolǵan jaǵdaida orman ziiankesteriniń oshaqtaryn oqshaýlaý jóninde sharalar qabyldaý, sondai-aq 2025 jyldan bastap tazartylǵan alańdarda orman otyrǵyzý boiynsha jumystardy bastaý kózdelgen. Osy maqsatta ótken jyly qaraǵai búrshigin jinaý jáne óńdeý kólemi ulǵaidy. Biyl qoldanystaǵy orman pitomnikterinde ekpeler otyrǵyzý kólemin ulǵaitý josparlanǵan.
Iri orman órtteriniń saldaryn joiý jónindegi jedel shtab quryldy, onyń quramyna Abai oblysy boiynsha Orman sharýashylyǵy jáne janýarlar dúniesi aýmaqtyq inspektsiiasynyń ókilderi, «Semei ormany» rezervatynyń mamandary, quqyq qorǵaý organdarynyń, Abai oblysy ákimdiginiń ókilderi kirdi.
"Jalpy, Abai oblysynyń aýmaǵynda bolǵan iri orman órtteriniń saldaryn joiý jónindegi jumystardy 2034 jylǵa qarai aiaqtaýdy josparlap otyrmyz", - deidi Ekologiia jáne tabiǵi resýrstar ministri.
