2023 jyly Abai oblysyndaǵy Semei ormanynda bolǵan alapat órtke arnalǵan «38» tolyqmetrajdy kórkem filmi 3 qyrkúiekten bastap elimizdiń barlyq kinoteatrlarynda kórsetiledi, dep habarlaidy ult.kz.
Film 15 adamnyń ómirin qiyp, 63 myń gektar ormandy kúlge ainaldyrǵan, jeti kúnge sozylǵan qaiǵyly oqiǵaǵa negizdelgen. Týyndy tabiǵat apaty men adam taǵdyryn arqaý etip, Qazaqstan tarihyndaǵy eń iri orman órtin jáne tilsiz jaýmen kúresken beibit kúnniń batyrlaryn baiandaidy.
Túsirilim jumystary Abai oblysynyń kórikti jerlerinde júrgizildi. Qoiýshy rejisser Tórebek Beisebaevtyń aitýynsha, órt sóndirý tehnikasymen jumys isteý film óndirisindegi eń kúrdeli tehnikalyq kezeńderdiń biri bolǵan.
Filmniń stsenariiin Nurjigit Haidarov pen Maqsat Jumahanov jazǵan. Qoiýshy operatory – Asylhan Medálbekov, qoiýshy sýretshisi – Oljas Álmenov, prodiýseri – Nurjigit Haidarov.
Basty rólderdi Almat Saqatov, Asan Májit jáne Altynai Nógerbek somdaǵan.
«38» – Semei ormanyndaǵy 2023 jylǵy qaiǵyly oqiǵaǵa arnalǵan jáne Qazaqstandaǵy eń iri orman órti týraly túsirilgen alǵashqy aýqymdy dramalyq filmderdiń biri bolmaq.
