Jambyl oblysynda shekara beketi arqyly ótetin júrgizýshilerden júieli túrde aqsha bopsalady degen kúdikpen qylmystyq top ustaldy, dep habarlaidy ult.kz.
23 qyrkúiekte oblystyq politsiia departamenti Ulttyq qaýipsizdik komitetiniń departamentimen birlesip arnaiy operatsiia júrgizgen. Kúdiktiler aýyr júk, jolaýshylar, jeńil jáne tranzittik kólik júrgizýshilerine qysym kórsetip, aqsha talap etken dep kúdikke ilindi.
Operatsiia barysynda 27 tintý júrgizildi. Nátijesinde sýyq qarý, bailanys quraldary, qomaqty aqsha jáne avtokólikter tárkilendi.
Qazir bopsalaý faktisi boiynsha qylmystyq is tergelip jatyr. Politsiia kúdiktilerdiń árqaisysynyń rólin, zańsyz árekettiń barlyq mán-jaiyn jáne qosymsha qylmys epizodtarynyń bar-joǵyn anyqtap jatyr.
Tergeý jalǵasýda.
