Sairamdyq politseiler Mankent aýylynda ornalasqan dámhanalardyń birinen Qyzyl kitapqa engizilgen úkini tapty, dep habarlaidy "Ult aqparat".
Sairam APB-nyń Tabiǵatty qorǵaý politsiia tobynyń inspektory politsiia aǵa leitenanty M.Botabek jáne Ákimshilik politsiia bóliminiń inspektory politsiia aǵa leitenanty M.Qýandyqov ekologiialyq qylmystardyń aldyn alý jónindegi jedel-profilaktikalyq is-sharalar júrgizý barysynda Mankent aýylynda ornalasqan kafelerdiń biriniń aýlasynan asyraýǵa tyiym salynǵan úlken úkini anyqtady.
Atalǵan jait QR QK-niń 339-baby «Sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan ósimdikter men janýarlar túrlerin, olardyń bólikterin nemese derivattaryn zańsyz paidalaný» boiynsha tirkelip, sotqa deiingi tergeý amaldary júrgizilýde. Aiǵaqty zat retinde alynǵan qus QR «Qyzyl kitabyna» engizilgen «Filin-Úkisi» bolyp shyqty. Ol Shymkent qalasynyń haiýanattar baǵyna jiberildi. Tártip saqshylary kúdikti turǵynnyń «Qyzyl kitapqa» engen qusty qandai maqsatta ustaǵanyn anyqtaýda. Sondai-aq tergeý barysynda turǵyn bul qusty 2015 jyldan beri asyrap kele jatqanyn jetkizgen. «Túrkistan oblysynyń politsiia qyzmetkerleri azamattarǵa QR «Qyzyl kitabyna» engizilgen sirek kezdesetin janýarlarmen zańsyz bailanys jasap, ustaǵandar 3 myń AEK deiingi aiyppul nemese 3 jylǵa deiingi merzimge bas bostandyǵynan shekteý nemese aiyrý túrindegi qylmystyq jaýapkershilik qarastyrylǵanyn eskertedi», delingen baspasóz qyzmetiniń habarlamasynda.
