Túrkistan oblysy Sairam aýdany Aqsýken aýylyndaǵy dámhanalardyń birinde bolǵan gaz jarylysynan zardap shekken segiz adamnyń ekeýi qaitys boldy. Bul týraly 13 mamyrda Oblystyq densaýlyq saqtaý departamentiniń baspasóz hatshysy Mira Músilim aitty.
Mira Músilimniń aitýynsha, qaitys bolǵandardyń biri – bes jasar bala, ekinshisi – zeinetker. Denesiniń 90 paiyzyn kúiik shalǵan zeinetker búgin, 13 mamyrda tańerteń qaitys bolǵan.
«5 jasar bala 11 mamyrda, al 1958 jyly týǵan naýqas búgin qaitys boldy. Qalǵan naýqastar oblystyq kúiikti emdeý ortalyǵyna aýystyryldy», - dedi Oblystyq Densaýlyq saqtaý basqarmasynyń baspasóz hatshysy.
Turmahan Orynbaev atyndaǵy oblystyq joǵary qysymdy ottegimen emdeý ortalyǵynyń bas dárigeri Mádina Ermahambetova denesiniń 80 paiyzyn kúiik shalǵan taǵy bir naýqastyń jaǵdaiy óte nashar ekenin aitady. Qalǵan naýqastardyń jaǵdaiy qalypty, palataǵa kóshirilgen.
9 mamyr keshkisin aýyzashar kezinde Túrkistan oblysy Sairam aýdany Aqsýkent aýylyndaǵy dámhanalardyń birinde 50 litrlyq gaz ballony jarylyp, segiz adamdy kúiik shalǵan.
Oblystyq politsiia departamenti buǵan deiin oqiǵaǵa bailanysty "Órt qaýipsizdigi talaptaryn buzý" babymen qylmystyq is qozǵalǵanyn habarlaǵan.
