تٷركٸستان وبلىسى سايرام اۋدانى اقسۋكەن اۋىلىنداعى دەمحانالاردىڭ بٸرٸندە بولعان گاز جارىلىسىنان زارداپ شەككەن سەگٸز ادامنىڭ ەكەۋٸ قايتىس بولدى. بۇل تۋرالى 13 مامىردا وبلىستىق دەنساۋلىق ساقتاۋ دەپارتامەنتٸنٸڭ باسپاسٶز حاتشىسى ميرا مٷسٸلٸم ايتتى.
ميرا مٷسٸلٸمنٸڭ ايتۋىنشا, قايتىس بولعانداردىڭ بٸرٸ – بەس جاسار بالا, ەكٸنشٸسٸ – زەينەتكەر. دەنەسٸنٸڭ 90 پايىزىن كٷيٸك شالعان زەينەتكەر بٷگٸن, 13 مامىردا تاڭەرتەڭ قايتىس بولعان.
«5 جاسار بالا 11 مامىردا, ال 1958 جىلى تۋعان ناۋقاس بٷگٸن قايتىس بولدى. قالعان ناۋقاستار وبلىستىق كٷيٸكتٸ ەمدەۋ ورتالىعىنا اۋىستىرىلدى», - دەدٸ وبلىستىق دەنساۋلىق ساقتاۋ باسقارماسىنىڭ باسپاسٶز حاتشىسى.
تۇرماحان ورىنباەۆ اتىنداعى وبلىستىق جوعارى قىسىمدى وتتەگٸمەن ەمدەۋ ورتالىعىنىڭ باس دەرٸگەرٸ مەدينا ەرماحامبەتوۆا دەنەسٸنٸڭ 80 پايىزىن كٷيٸك شالعان تاعى بٸر ناۋقاستىڭ جاعدايى ٶتە ناشار ەكەنٸن ايتادى. قالعان ناۋقاستاردىڭ جاعدايى قالىپتى, پالاتاعا كٶشٸرٸلگەن.
9 مامىر كەشكٸسٸن اۋىزاشار كەزٸندە تٷركٸستان وبلىسى سايرام اۋدانى اقسۋكەنت اۋىلىنداعى دەمحانالاردىڭ بٸرٸندە 50 ليترلىق گاز باللونى جارىلىپ, سەگٸز ادامدى كٷيٸك شالعان.
وبلىستىق پوليتسييا دەپارتامەنتٸ بۇعان دەيٸن وقيعاعا بايلانىستى "ٶرت قاۋٸپسٸزدٸگٸ تالاپتارىن بۇزۋ" بابىمەن قىلمىستىق ٸس قوزعالعانىن حابارلاعان.
