Sairam aýdanynda 700 tonnadan astam sút ónimi shyǵaryldy, dep habarlaidy "Ult aqparat".
Tamaq ónerkásibi aýdannyń turaqty ekonomikalyq damýynda asa mańyzdy oryn alady. Azyq-túlik ónimderiniń óndirisi óńdeý ónerkásibiniń eń qarqyndy damyp otyrǵan sektory bolyp tabylady.
Osyny eskergen Sairam aýdanynyń ákimdigi tamaq ónerkásibin damytý maqsatynda júieli jumystar atqardy. Nátijesinde 2017 jyldyń qańtar-shilde ailarynda 9 559,4 mln teńgege tamaq ónimderi óndirilgen. Ótken jyldyń osy kezeńimen salystyrǵanda ósim 18,2 paiyzdy quraǵan. Salada tabiǵi túrde 725 tonna sút ónimderi, 51 596 tonna un, 60 tonna shujyq ónimderi men 720,4 myń litr ózge de alkogolsiz sýsyndar óndirilgen.
Tamaq ónerkásibi salasyndaǵy osyndai kásiporynnyń biri - sút ónimderiniń birneshe túrin óndiretin 2007 jyly iske qosylǵan «Kompaniia Natýr Prodýkt» JShS. Kásiporyn búgingi tańda qarqyndy damý ústinde. Óndiriste «Han» saýda markasymen sút ónimderi: airan, irimshik, iogýrt, qurt, sary mai shyǵarylady.
Seriktestik Aqbulaq aýylynda ornalasqan. Táýligine 20 tonna sút óńdeýge qaýqarly óndiris ornynda 32 jergilikti turǵyn turaqty jumyspen qamtylǵan. 2016 jyldyń qorytyndysynda óndiriste 108,2 mln teńgeniń ónimi óndirilip, biýdjetke 19,2 mln teńge salyq tólegen. Al jeti ai ishinde 71 mln teńgeniń ónimi óndirilgen.
Kásiporynǵa «Agrobiznes 2020» memlekettik baǵdarlamasy aiasynda jyl saiyn sary mai men irimshikke sýbsidiia bólinedi. Búgingi tańda kásiporyndy keńeitý maqsatynda óndiris qýattylyǵyn arttyrý úshin táýligine 70 tonna sút óńdeitin qural-jabdyqtar alynyp, montajdaý jumystary bastalǵan. Qosymsha bes jumys ornynyń ashylýy josparlanyp otyr.
Kásiporyn basshysy aldaǵy ýaqytta óndiristi keńeitý maqsatynda Aqsý aýylynda táýligine 150 tonna sút óńdeitin jańa zaýyt qurylysyn júrgizýdi josparlap otyr.
