Ýchaskelik politsiia inspektory óz ómirin qaterge tigip, jol-qozǵalysy erejesin buzǵan kólikti toqtatty, dep habarlaidy "Ult aqparat" oblystyq politsiia departamentine silteme jasap.
Aqsýkent aýyly kósheleriniń birinde túngi patrýl kezinde Sairam APB JPQ politsiia qyzmetkerleri kúdik týǵyzǵan «VAZ» avtokóligin baiqady. Tártip saqshysy júrgizýshige toqtaýdy kórsetti, biraq ol zańdy talaptarǵa baǵynbai, jasyrynýǵa tyrysty.
Osy kezde ýchaskelik inspektor Dáýren Baiharashev tártip buzýshynyń jolyn japty. Alaida, júrgizýshi baǵynbai, qozǵalysyn jalǵastyryp, politseidi soqty. Biraq Dáýren kapotqa sekirip úlgerdi.
Tártip buzýshy maior Baiharashevty kóliktiń ústinen túsirýge tyrysyp, qatty jyldamdyqpen aýyl kóshelerimen júredi. Óziniń kásibiligi men dene daiyndyǵynyń arqasynda politsei kapottan myqtap ustap tura aldy. Osy kezde ýchaskelik inspektordyń áriptesteri júrgizýshiniń izine túsip, tártip buzýshyny qýa jóneldi.
Sondai-aq, onyń ustalýyna «Aýdi» júrgizýshisi kómek kórsetti. Ol óziniń azamattyq boryshyn oryndai otyryp, avtokólikti toqtatýǵa tyrysty. Osyǵan qaramastan VAZ júrgizýshisi jyldamdyqty tómendetpei aýyl turǵynynyń kóligin soqty.
Sodan keiin politsiia qyzmetkerin kapotpen súirei otyryp, Almaty-Termez tasjolyna shyǵyp, kórshi Qarabulaq aýylyna jetpei avtokóligin tastap, qashyp ketken. Ýchaskelik politsiia inspektory Dáýren Baiharashevqa alǵashqy meditsinalyq kómek kórsetildi.
Sairam APB politsiia qyzmetkerleri jedel-izdestirý is-sharalary barysynda kúdikti retinde jergilikti turǵyndy quryqtady. Ol óz kinásin tolyq moiyndady.
Bul jait QR QK 380-baby 2-bóligi «Bilik ókiline qatysty kúsh qoldaný» boiynsha tirkeldi. Saraptama taǵaiyndaldy. Atalǵan jait boiynsha sotqa deiingi tergeý amaldary júrgizilýde. Qazirgi ýaqytta tergeý oqiǵanyń tolyq mán-jaiyn anyqtaýda.
Óz kezeginde, Sairam APB-nyń jergilikti politsiia qyzmetiniń ýchaskelik politsiia inspektory politsiia maiory Dáýren Baiharashev qyzmet kórsetiletin ákimshilik ýchaskede qoǵamdyq tártip pen azamattardyń qaýipsizdigin qamtamasyz etý boiynsha qyzmetin jalǵastyrýda.
Túrkistan oblysynyń politseileri azamattardy jol qozǵalysy erejelerin saqtaýǵa shaqyrady. Jyldamdyqty asyrmańyz, manevr jasaý erejelerin buzbańyz jáne qarsy qozǵalys jolaǵyna shyqpańyz, sondai-aq bilik ókilderiniń zańdy talaptaryna baǵynyńyz.
