Elordada sailaýdyń ótý barysyn baiqaýshy Italiiadaǵy Eýroparlament depýtaty Fýlfio Martýshello saiasi oqiǵaǵa qatysý úshin Qazaqstanǵa arnaiy kelgen otandasymyzdyń belsendiligin erekshe atap ótti, dep habarlaidy QazAqparat.
«Men sailaý bastalǵaly birneshe ýchaskege bardym. Bizdiń esep boiynsha ol ýchaskelerde tańerteń sailaýǵa qatysýshylardyń 42% óz tańdaýyn jasady. Bul - halyqtyń belsendiliginiń kórsetkishi jáne ol bul úrdis biz ketem degenshe jalǵasyn tapty. Sonymen qatar, sailaý ýchaskelerinde tiisti sanitarlyq talaptardyń oryndalý barysyn baiqadym. Sailaý protsesin baqylaý munymen bitpeidi, biz basqa da elderden kelgen áriptesterimizben talqylaý ótkizemiz. Odan bólek, azamattardyń osy sailaýǵa qatysty basqa da suraqtary bolsa, ony meniń elektrondy poshtama joldaý múmkindikteri bar», - dedi Fýlfio Martýshello elordada táýelsiz halyqaralyq baiqaýshylardyń qatysýymen ótken baspasóz máslihatynda.
Onyń aitýynsha, sailaýǵa kelýshilerdiń arasynda áielder men jastar basym.
«Biz sailaý ýchaskesine barǵanda aldymen halyqpen sóilesemiz, iaǵni sailaýshylarmen áńgimelesemiz. Sodan soń ǵana uiymdastyrýshylarmen suhbattasamyz. Ózim barǵan sailaý ýchaskelerinde birneshe jaitqa kýá boldym. Bir kisi sailaý ýchaskesiniń ashylýyna 1 saǵat qalǵanda erte kelip alǵan. Belsendi sailaýshymen sóilesip, sáttilik tiledim. Ekinshi jaǵdai - Qazaqstan azamaty sailaýǵa qatysý úshin Ystanbuldan (Túrkiia) arnaiy kelgen, bul shynyn aitý kerek, meni tańǵaldyrdy», - deidi ol.
