Qazaqstandyq sarapshylar Sailau Talks-2021 alańynda elimizde ótip jatqan Parlament sailaýynyń mańyzy men ereksheligi týraly aitty, dep habarlaidy QazAqparat.
«2021 jylǵy sailaýdyń birinshi ereksheligi – konstitýtsiialyq merzimge sai, iaǵni óz kezegimen ótip jatyr. Ekinshiden, Qazaqstanda tuńǵysh ret máslihat sailaýy partiialyq tizim boiynsha ótedi. Úshinshiden, tuńǵysh ret saiasi partiialardyń barlyq tiziminde 30% kvota saqtalǵan. Tórtinshiden, sailaýdan keiin jańa Parlamenttiń quramynda bizde eń alǵash ret «parlamenttik oppozitsiia» degen túsinik qalyptasady. Men osy tórt erekshelikti atap ótkim keledi», - deidi Qazaqstan strategiialyq zertteýler institýtynyń bólim basshysy Alýa Joldybalina.
Sondai-aq, Qazaqstan strategiialyq zertteýler insttitýtynyń sarapshysy Madina Bektenova biylǵy sailaýdyń ereksheligi – koronavirýs pandemiiasy jaǵdaiynda ótip jatqanyn basa aitty.
«Kóptegen memleket osyndai jaǵdaida sailaý ótkizýden bas tartty, degenmen sailaý ótkizgen memleketter de bar. Qazaqstan sol kezeńnen sátti ótken memleket qataryna jatady. Búgin bizde barlyq saqtyq sharalaryn saqtai otyra sailaý ótip jatyr. Sailaýdyń basty ereksheligi – óz ýaqytynda ótip jatyr. Buǵan deiingi Parlament Májilisi sailaýy 5 ret merziminen buryn ótken», - deid ol.
