Kandidattardyń sailaý aldyndaǵy pikirsaiysyn ótkizý úshin 63 mln teńge jumsalady. Bul týraly búgin QR Ortalyq sailaý komissiiasynyń múshesi Anastasiia Shegortsova aitty, dep habarlaidy QazAqparat.
OSK otyrysynan keiin uiymdastyrylǵan baspasóz máslihatynda BAQ ókilderi teledebat ótkizý úshin «Habar» telearnasyna qansha qarajat bólinetinin suraǵan edi.
«Habar» telearnasynyń ótinimi boiynsha 63 mln teńge bólinedi», - dep jaýap berdi Anastasiia Shegortsova.
Al «Habar» agenttigi» AQ basqarma tóraǵasynyń orynbasary Dáýlethan Jienqulov bul qarajattyń qaida jumsalatynyn aitty.
«Birinshiden, kelisimshart jasalsyn, qarajat qazynaǵa tússin. Sodan keiin aitamyz. Ekinshiden, tikelei efir kezindegi bailanysqa, dekoratsiiaǵa, stýdiia jabdyqtaýǵa, jaryqqa jumsalady. Bul bir ret qana bolatyn is-shara bolǵandyqtan arnaiy stýdiia jasalady. Qosymsha adamdardy jumysqa tartýǵa da qarjy jumsalady. Endi televidenieniń tehnologiiasyn biletin adam aqshanyń qaida jumsalatynyn biledi dep oilaimyn», - dedi ol.
Osy oraida Anastasiia Shegortsova telearnanyń biylǵy biýdjetinde teledebat ótkizýge qarajat qarastyrylmaǵanyn atap ótti.
«Bul qarajat Ortalyq sailaý komissiiasynyń shyǵyndar smetasynda qarastyrylǵan. Zańǵa sáikes, OSK-niń debat ótkizýge múmkindigi bar», - dedi OSK múshesi.
