Soltústik Qazaqstan oblysynda sailaý kúni 3643 baiqaýshy jumys istese, sonyń 190-y – shetten kelgender boldy, dep habarlaidy QazAqparat.
«Partiialyq emes baqylaý ortalyǵy» RQB SQO filialy tóraǵasy Janat Muhametjanovtyń aitýynsha, birlestiktiń baiqaýshylary sailaý ýchaskeleri ashylǵan sátinen bastap jabylǵansha jumys istedi. Olar óńirdegi 640 ýchaskeniń 628-in qamtydy, saiasi naýqannyń ótý barysyn baiqady.
«Bizdiń baiqaýshylar eshbir zańbuzýshylyq tirkegen joq. Halyq óz erkimen kelip, tańdaý jasady. Halyq bul kúndi mereke retinde sezinip, jaqsy kóńil kúimen qabyldady. Ár sailaý ýchaskesinde shaǵyn jármeńke, býfet uiymdastyrylǵan eken. Jalpy sailaý zańǵa sáikes ótti. Biz negizi táýelsiz baiqaýshylarmyz. Bul kúni 3 aýysym boiynsha jumys istedik», - dedi Janat Muhametjanov.
SQO-da sailaýdyń ádil ótýin 3 643 baiqaýshy baqylady. Olardyń 190-y – halyqaralyq baiqaýshy. Sondai-aq 2 myńy - partiialyq emes uiymdardyń atynan tirkelgen. Olar daýys berý aiaqtalǵannan keiin biýletenderdi sanaýǵa qatysty.
«Sailaýdyń qalai ótip jatqanyn, talaptar saqtaldy ma, sailaýshylardyń quqyǵy buzylǵan joq pa sony baqyladyq. Biz eshqandai kemshilikter kórgen joqpyz. Sailaý ýchaskelerinde úgit materialdary bolǵan joq», - dedi baiqaýshy Beibit Ábilev.
Jalpy SQO-da 640 sailaý ýchaskesi jumys istedi. Tizim boiynsha 386 myń sailaýshy boldy. QR Ortalyq sailaý komissiiasynyń azamattardyń kelýi týraly aldyn ala aqpary boiynsha óńir turǵyndarynyń 79,01 % daýys berdi.
