Sailaý ýaqytynda qoǵamdyq qaýipsizdikti saqtaýǵa búkil Qazaqstanda 10 myń politsei jumyldyrylady. Bul týraly Ishki ister ministrliginde ótken baspasóz máslihatynda QR IIM Ákimshilik politsiia komitetiniń tóraǵasy Maqsat Baibolov málim etti, dep habarlaidy QazAqparat tilshisi.
«Ózderińiz biletindei, 7-12 maýsym aralyǵy - kezekten tys sailaý ýaqytynda biz kúsheitilgen qyzmet túrine aýysamyz. Sailaý aldyndaǵy kezeńde «Sailaý týraly» konstitýtsiialyq zańnamaǵa sáikes, barlyq aimaqtarda quqyqtyq tártip pen qoǵamdyq qaýipsizdik qamtamasyz etiletin bolady. Jalpy, IIM el aýmaǵynda qoǵamdyq qaýipsizdiktiń turaqty bolýy úshin barlyq sharalardy qabyldap jatyr», - dedi Maqsat Baibolov.
Komitet tóraǵasynyń aitýyna qaraǵanda, iri qalalarǵa, máselen Nur-Sultanǵa basqa aimaqtardan politsiia qyzmetkerlerin tartý josparlanyp otyrǵan joq.
«Nur-Sultandaǵy qoǵamdyq qaýipsizdikti saqtaý úshin barynsha kóp qyzmetker jumyldyrylatyny anyq. Al sailaý ýchaskelerine (barlyq óńir boiynsha) 19 myńǵa tarta qyzmetker jumyldyrylady. Sebebi, zańǵa sáikes, biýlletenderdi qorǵaý - politsiia qyzmetkerleriniń mindeti. Al jalpy, el boiynsha qoǵamdyq qaýipsizdik sharalaryna 10 myń politsiia qyzmetkeri tartylady», - dedi Maqsat Baibolov.
Aita ketsek, buǵan deiin 9 maýsym kúni ótetin prezident sailaýynda tótenshe jaǵdai qyzmeti de kúsheitilgen rejimde jumys isteitini habarlanǵan bolatyn.
