Búgin QR Ortalyq sailaý komissiiasynyń otyrysynda Májilis depýtattarynyń kezekti sailaýyna Qazaqstan halyq partiiasynyń partiialyq tizimin tirkeý týraly qaýly qabyldandy, dep habarlaidy "Ult aqparat".
QR OSK múshesi Asylbek Smaǵulovtyń aitýynsha, «Qazaqstan Respýblikasyndaǵy sailaý týraly» Konstitýtsiialyq zańnyń 89-babyna sáikes bir saiasi partiiadan tizimge engizilgen adamdardyń sany saiasi partiialar arasynda bólinetin depýtattyq mandattardyń belgilengen sanynan 30 paiyzǵa aspaityn bir ǵana tizimdi tirkeýge jol beriledi.
Partiialyq tizimde áielder men 29 jasqa tolmaǵan adamdardyń sany oǵan engizilgen adamdardyń jalpy sanynyń keminde 30 paiyzyn quraýǵa tiis.
«Qazaqstannyń halyq partiiasynyń partiialyq tiziminde 113 adam bar. 41 áiel jáne 29 jasqa tolmaǵan adamdar engizilgen. Bul tizimge engizilgenderdiń jalpy sanynyń 36,3 paiyzyn quraidy. Ýákiletti organdar usynǵan málimetter negizinde Ortalyq sailaý komissiiasy Májilis depýtaty bolyp sailaný úshin partiialyq tizimge engizilgen adamdardyń Konstitýtsiia men «Sailaý týraly» Konstitýtsiialyq zańnyń talaptaryna sáikestigine tekserý júrgizdi. Partiialyq tizimge engizilgen barlyq adamdar Konstitýtsiianyń jáne «Sailaý týraly» Konstitýtsiialyq zańnyń talaptaryna sáikes keledi», - dedi ol.
Osyǵan bailanysty Ortalyq sailaý komissiiasynyń músheleri «2021 jylǵy 10 qańtarǵa taǵaiyndalǵan Qazaqstan Respýblikasy Parlamenti Májilisi depýtattarynyń kezekti sailaýyna «Nur Otan» partiiasynyń partiialyq tizimin tirkeý týraly» qaýly qabyldady.
