QR Ortalyq sailaý komissiiasynyń múshesi Asylbek Smaǵulov prezidenttikke kandidattar arasyndaǵy televiziialyq pikirsaiys qansha ýaqytqa sozylatynyn aitty, dep habarlaidy QazAqparat.
«Televiziialyq pikirsaiys «Habar» telearnasynda ótedi. Uzaqtyǵy 80 minýttan kem bolmaidy. Kim qai tilde sóilegisi keledi, qai tilde suraq qoiǵysy keledi, sol tilde ótedi. Mysaly, sailaýshylardyń atynan da suraqtar kelip túsýi múmkin. Suraq qai tilde qoiylsa, sol tilde jaýap beredi», - dedi ol OSK otyrysynan keiin uiymdastyrylǵan baspasóz máslihatynda.
Al «Habar» agenttigi» AQ basqarma tóraǵasynyń orynbasary Dáýlethan Jienqulov televiziialyq pikirsaiys ýaqyty sozylýy múmkin ekenin joqqa shyǵarmady.
«Teledebat keminde 80 minýt bolady dep otyrmyz. Ol kandidattardyń baǵdarlamasyn tanystyrýyna, suraqtarǵa jaýap berýine bailanysty uzaryp ketýi de múmkin. Sondyqtan kandidattarǵa qandai da bir shekteý bolady dep oilamaimyn», - dedi ol.
Sonymen qatar Dáýlethan Jienqulov agenttiktiń elektrondy poshtasyna sailaýshylardan suraqtar kelip túsip jatqanyn jetkizdi.
«Suraqtar videoformatta bolady. Kez kelgen azamat ózi tańdaǵan kandidatqa saýalyn joldai alady. Kimnen kelse de, suraq qoiylady. Saýaldyń tikelei efirde qoiylýyna reglament múmkindik bermeidi», - dedi telearna ókili.
