Almatylyqtarǵa oblys aýmaǵynda ornalasqan saiajaiyna barýǵa ruqsat etildi. Ol úshin ákimdikke eshqandai qosymsha ótinish berýdiń qajeti joq. Bul týraly Almaty qalasy ákiminiń birinshi orynbasary Erlan Qojaǵapanov brifing barysynda málim etti, dep habarlaidy "Ult aqparat".
Onyń aitýynsha, qala turǵyndary saiajaiǵa barý úshin arnaiy bekitilgen erejeni saqtaýy tiis.
«Eń aldymen saiajaiǵa baratyn adamnyń qolynda menshigin rastaityn zańdy qujaty bolýy kerek. Sodan keiin ol jaqqa ózin qosqanda úsh adam ǵana bara alady. Mindetti túrde meditsinalyq maska taǵyp, qolynda antiseptik bolýy shart. Sondai-aq, asa qajettilik bolmasa saiajai aýmaǵynan shyǵýǵa bolmaidy. Qonaq shaqyrýǵa tyiym salynady», – dedi Erlan Qojaǵapanov
Sonymen qatar, ol jasy 65-ten asqan almatylyqtarǵa úide qalý jóninde keńes berdi.
«Osy erejelerdi ázirleý kezinde biz saiajaiǵa barýǵa ruqsat suraityndardyń basym bóligi elektrondy ótinish berýge qinalatyn egde jastaǵy azamattar ekendigin eskerdik. Sondyqtan jedel shtab saiajaiǵa baratyn azamattardyń júrip-turýyn meilinshe jeńildetýge tyrysty. Endi almatylyqtar tek saiajaiynyń bar ekenin rastaityn qujat pen jeke kýáligin kórsetse jetkilikti», – deidi Almaty ákiminiń birinshi orynbasary.
Sondai-aq, ol saiajaidyń maqsatqa sáikes paidalanylýy ishinara tekseriletinin eskertti.
