«AMANAT»-tyń elimiz boiynsha 14 myńnan astam múshesi partiianyń aýmaqtyq filialdarynyń 225 konferentsiiasyna qatysty. Olar partiianyń jańa Saiasi tuǵyrnamasynyń jobasyn talqylap, barlyq oblys pen Astana, Almaty jáne Shymkent qalalaryndaǵy filialdarda erteń ótetin konferentsiialarǵa qatysý úshin delegattardy sailady.
Máselen, búgin elordanyń 4 aýdanynda konferentsiialar ótip, oǵan 275 adam qatysty. Partiianyń Esil aýdandyq filialy konferentsiiasynyń delegaty, «Qoǵam» bastaýysh partiia uiymynyń (BPU) múshesi Erden Ordabek tuǵyrnama saiasi dialogty nyǵaitýǵa jańa seripin beredi dep esepteidi.
«Tuǵyrnamada qoǵamymyzdy damytýdyń barlyq negizgi baǵyty kórinis taýyp otyr. Shyn máninde bul qujatta qazaqstandyqtardyń arman-muraty men úmiti tolyqtai eskerilgen. Joba partiialyqtardyń arasynda birneshe ret qyzý talqylaýdan ótti. Tuǵyrnama partiianyń qatarynda kóp jyldan beri múshe bolyp kele jatqandardy da, onyń jańa múshelerin de bir maqsatqa biriktiretin qujat bolatynyna senemiz», - dedi ol.
Astana qalasyndaǵy «Birlik» filialynyń atqarýshy hatshysy Shyńǵyshan Qojahmetov partiialyqtardyń basym bóligi Saiasi tuǵyrnamanyń jobasyn qoldaǵanyn alǵa tartty.
«Elimizde aýyzbirshilik pen turaqtylyqtyń bolýy óte mańyzdy jáne dál osy myzǵymas qundylyqtar tuǵyrnamada jazylǵan. Ol tek partiia múshelerine ǵana emes, Qazaqstannyń barlyq azamatyna arnalady. Bul – búkil elimizdiń damý vektoryn aiqyndaityn baǵdarlamalyq qujat», - dedi ol.
Shyǵys Qazaqstan oblysyndaǵy 11 aýmaqtyq konferentsiiaǵa barlyǵy myńnan astam partiia múshesi jinaldy. Óskemen qalalyq máslihatynyń depýtaty, aqyn-dramatýrg Áskerhan Hýanbaidyń aitýynsha, halqymyzdyń tarihy, taǵdyry men keleshegi týǵan tilimizden tamyr tartady.
«Qazaq tili myńjyldyq mádenietimiz ben órkenietimizdiń negizi ári tiregi sanalady. Munyń tuǵyrnama mátininde kórinis tapqany asa mańyzdy. Memlekettik tildi qoldaýǵa, ulttyq qundylyqtarymyzdy, dástúrimiz ben ádet-ǵurpymyzdy qorǵaýǵa kóbirek kóńil bólý qajet. Saiasi reforma bastamalaryn tolyq qoldaimyz», – dedi depýtat.
Al Pavlodar oblysyndaǵy 13 aýmaqtyq filialdyń konferentsiia jumysyna partiianyń 842 múshesi qatysty. «Jastar Rýhy» jastar qanatynyń oblystyq filialynda «miǵa shabýyl» formatynda jańa saiasi tuǵyrnamanyń jobasy talqylandy.
«Jastar – el erteńi. Joǵary deńgeide qabyldanatyn barlyq jahandyq sheshim eń aldymen solarǵa áser etedi. Sondyqtan, ár jas azamat óz úlesin qosyp, qujat mátinin muqiiat zerttep, qurby-qurdastarymen talqylaǵany mańyzdy. Jastar qanatynyń ár múshesi tuǵyrnama týraly aityp, óz usynysyn engizedi», – dedi «Jastar Rýhy» jastar qanatynyń Pavlodar oblystyq filialynyń tóraǵasy Sanira Júsipova.
Al Batys Qazaqstan oblysynda partiianyń 700 múshesi «AMANAT» partiiasynyń 13 aýmaqtyq filialynyń konferentsiiasyna jinaldy.
«Bizdiń mindetimiz – Qazaqstannyń aýmaqtyq tutastyǵyn jáne myzǵymastyǵyn saqtap qalý, onyń qaýipsizdigin nyǵaitý, halyqtyń ál-aýqatyn jaqsartý. Memleket basshysy Qasym-Jomart Kemeluly Toqaevtyń reformalaryn tolyq qoldaimyz. Bul reformalar elimizdiń saiasi júiesin jańǵyrtýǵa baǵyttalǵan. Bizdiń ldymyzda Demokratiialyq qaǵidattarǵa negizdelgen Ádiletti Qazaqstandy qurý úshin osy reformalardy tabysty júzege asyrý minedi tur», – dep málimdedi Oral qalalyq konferentsiiasynyń delegaty, mektep direktory Ázima Gýbasheva.
Partiianyń aýmaqtyq filialdary konferentsiialary otyrysynyń qorytyndysy boiynsha partiianyń aýmaqtyq filialdarynyń konferentsiialaryna qatysý úshin delegattar sailandy.
Eske sala keteiik, 6 qazanda Astana qalasynda «AMANAT» partiiasynyń kezekten tys XXIV Sezi ótedi. Sezd jumysyna elimizdiń barlyq óńirinen delegattar qatysady.
