«Qazaqstan» telearnasynan Nursultan Nazarbaevtyń arnaiy suhbatyna negizdelgen «Nur-Sultan. Qoltańba» derekti filmi shyǵady. Elbasy suhbatynda elordanyń ótkeni men bolashaǵy týraly saýaldarǵa jaýap berdi. Bul týraly telearnanyń baspasóz hatshysy Aidyn Dúisenbaiqyzy habarlady.
«El astanasyn ortalyqqa kóshirý týraly sheshimdi qabyldaý ońai bolǵan joq. Kópshilik qarsy boldy. Respýblika astanasy retinde qarastyrǵan qalalar tiziminde Almaty, Aqtóbe, ózim jiyrma jyl qyzmet etken Qaraǵandy bar edi. Biraq qazirgi sheshimime ókinbeimin. Astana eldiń basyn biriktirgen úlken shaharǵa ainaldy. Jospar boiynsha 500-600 myń turǵyny bar ákimshilik qala bolýy tiis edi, biraq qalanyń ómirin toqtatýǵa bolmaitynyn túsindik», - dedi Elbasy jýrnalist Lázzat Tanysbaiǵa bergen suhbatynda.
Suhbatta Nazarbaev saiasi táýekelderge barý sebepterin, sonymen birge elorda halqynyń bolashaqtaǵy shekti sany, keleshekte qala turǵyndaryna jasalatyn igilikter men qala qurylysyna qatysty jańa josparlar týraly baiandaidy.
Jobada qazaqstandyq sáýletshiler, qaladaǵy erekshe nysandardy salýǵa atsalysqan Amanjol Chikanaev, Serik Rýstambekov, Baiǵutty Tortaev, britaniialyq arhitektor Norman Fosterdiń suhbattary bar.
«Qazaqstan» telearnasy baspasóz qyzmetiniń málimetinshe, derekti film 5 shilde kúni saǵat 20:00-de efirge shyǵady.
