QR Aqparat jáne qoǵamdyq damý ministri Aida Balaeva Saiasi qýǵyn-súrgin qurbandaryn tolyq aqtaý jónindegi memlekettik komissiiaǵa kómek retinde ministrlik saitynda ǵalymdardyń materialyn jariialaityn paraqsha ashýdy usyndy, dep habarlaidy QazAqparat.
«Jas ǵalymdardyń komissiia jumysyna qosylý jáne qatysý múmkindigin qarastyrý qajet dep sanaimyn, óitkeni bul jas tarihshylardyń ǵylymi izdenisteri úshin jaǵdai jasaýǵa yqpal etedi. Arhivterdiń qoljetimdi bolýy da – taptyrmas múmkindik. Óńirlerde de biregei jumystar júrgizilip jatyr, óitkeni bul jas ǵalymdardyń jumysyn óńirlik deńgeide uiymdastyrýǵa kómektesedi. Munyń bárin bir alańǵa negizdeý kerektigi túsinikti. Komissiiaǵa kómek retinde bizdiń saitymyzda ǵalymdardyń materialdaryn, ǵylymi maqalalaryn jariialai alatyn jeke paraqsha qurýdy usynamyn. Osylaisha biz olardy bólek júielei alamyz», - dedi A. Balaeva «ALJIR» kesheninde jas ǵalymdarmen kezdesýde.
Onyń aitýynsha, bul jumysqa barsha qoǵamdy tartý qajet.
«Jekelegen jumys toptary jumys isteitini túsinikti. Munda búkil qoǵamdy bailanystyrý mańyzdy. Óitkeni, árbir qazaqstandyq otbasynyń óz tarihy bar, árbir adam muraǵatty jeke esteliktermen tolyqtyra alady jáne olarǵa ashyq túrde qoljetimdi etýge bolady. Sondyqtan Aqparat jáne qoǵamdyq damý ministrligi retinde jas ǵalymdarǵa óz áleýetin keńinen paidalanýǵa, tiisinshe halyqaralyq áriptesteriniń nazaryn aýdarýǵa múmkindik berý úshin jeke aqparattyq alańdar, aidarlar, baǵdarlamalar qurýǵa daiynbyz», - dedi ministr.
Ministr bul máselede halyqaralyq deńgeide ózara is-qimyl qurý mańyzdy ekenin atap ótti.
«Máselen, «ALJIR» biregei keshenine jyl saiyn kóptegen elderdiń elshilikteri keledi. Árbir el munda analary, ájeleri jerlengenin kórsetkisi keledi. Beinejazba túsiredi, gúl shoǵyn qoiady. Bul jas ǵalymdardy basqa elderde turatyn áriptesterimen bailanysýǵa yntalandyrady. Halyqaralyq deńgeide ózara is-qimyl jasaý óte mańyzdy, óitkeni bul komissiianyń tiimdi jumys isteýine yqpal etedi, osyndai qaiǵyly oqiǵalarǵa tap bolǵan elderdi jobaǵa tartýǵa múmkindik beredi», - dedi Aida Balaeva.
