Saiasattanýshy Daniiar Áshimbaev Parlamentke ótýge múmkindigi joǵary úsh partiiany atady, dep habarlaidy QazAqparat.
«Birinshiden, sailaý óz ýaqytynda ótedi – Májilistiń quzyreti kelesi jyldyń naýryz aiynda aiaqtalady da, Parlamenttiń tómengi palatasynyń jumysy jalǵasa beredi. Buǵan deiin sailaýdyń ótetini jaily jeltoqsannyń sońyna qarai belgili bolatyny týraly boljamdar aitylyp edi. Alaida olai bolmai shyqty. Aitpaqshy Qazaqstan tarihynda josparly sailaýdan qaraǵanda merziminen buryn ótetin sailaýlar kóp bolypty. Jalpy Prezident sailaýynyń da merziminen buryn ótýiniń de eshqandai «tragediiasy» joq. Merzim bul rette kóp uzaq bolǵan emes, álemdik tájiribege sai bilik sailaý úshin eń yńǵaily ýaqytty tańdap otyrdy», - dep jazady saiasattanýshy Facebook paraqshasynda.
Daniiar Áshimbaevtyń aitýynsha 7-shi Májiliske úsh parlamenttik partiianyń, atap aitqanda «Nur Otan», «Aq jol» jáne QHKP-nyń ený múmkindigi joǵary.
«Nelikten bulai oilaitynymdy túsindireiin. «Nur Otan» partiiasy – qansha aitqanmen ortalyq ári Nazarbaevtyń partiiasy, turaqtylyq pen kelisim baǵdary. Qazirgi jaǵdaida kórshi memleketterdegi jaǵdaidy esepke ala otyryp, bul qundylyqtardyń bizdiń qoǵamǵa kerektigin túisinesiń. Praimeriz boiynsha kampaniia «Nur Otan» partiiasy kandidattyq korpýsty jańartyp, debattardyń tájiribesine ie bolyp, ashyq kampaniiaǵa daiyn ekenin aiǵaqtap berdi. «Aq jol» men QHKP da keiingi jyldary belsendilikterin arttyra tústi. Elektoratpen jumys júrgizip, barlyq alańda ózderin tanyta bildi. Qalǵan partiialar týraly aitar bolsaq, olar kózge kórinbedi de. Sol sebepti sailaý 2020 jyldyń jeltoqsan pen 2021 jyldyń qańtar ailarynda ótedi. Bárinde de daiyndalyp alarlyq ýaqyt boldy. Jańa partiialardy tirkeýdi jeńildetetin normalar qabyldandy. Parlamenttik oppozitsiia mártebesi týraly zańǵa ózgeristerdi engizildi», - deidi ol.
Saiasattanýshy sonymen qatar jastar men áielderge kvota berý, partiialyq tizim boiynsha máslihat sailaýyn ótkizý sharýalary kúrdeli emestigin jetkizdi.
Eske sala ketsek búgin Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialaǵan bolatyn.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy», - dedi Prezident úndeýinde.
