Saiasattanýshy Baýyrjan Serikbaev biylǵy ótetin aýyldyq deńgeidegi ákimderdi tikelei sailaýǵa qatysty pikir bildirdi, dep habarlaidy QazAqparat.
Baýyrjan Serikbaevtyń aitýynsha, Qazaqstanda 2300-den astam aýyl ákimi bar. 2023 jylǵa deiin barlyǵyn óz merziminiń aiaqtalýymen halyq sailaityn bolady.
«Bul tikelei preziden Qasym-Jomart Toqaev myrzanyń saiasi reformasymen iske asyp jatqan, elimizde demokratiialyq basqarý printsipterin ornyqtyratyn tarihi qadam. Orta Aziia elderiniń ishinde Qazaqstan aýyl ákimderin sailaýdy birinshi bolyp qolǵa aldy. Memleket, qoǵam úshin tájiribe, syn saǵat bolatyn mańyzdy saiasi protsess», - deidi saiasattanýshy.
Sonymen qatar, ol sailaýdyń ereksheligine toqtaldy.
«Aýyl ákimine salyqtyń 9 sanatynan túsketin óz biýdjeti beriledi. Ákimniń burynǵydai aýdan ákimine jaltaqtamai, óz biýdjetimen aýyldyń máselesin sheshe alatyn múmkindigi bolady. Halyq sailaidy. Ákim tikelei óz sailaýshylarynyń aldynda jaýapty bolamaq. Halyq senimsizdik tanytyp, unamaǵan ákimdi keri qaitaryp ala alady. Ákim bolý úshin jasy 25-ke tolǵan, joǵary bilimdi, memlekettik qyzmette eńbek tájiribesi bar nemese aýyl sharýashylyǵy salasynda, jeke sektorda basshylyq qyzmette bolǵan azamattar sailana alady. Ákim 4 jyl merzimge sailanady. Sonymen qatar, kandidattar ózin-ózi usyna alady. Ol úshin sailaýshylardyń 1% daýsyn alýy tiis. Taǵy bir aita keterligi, sailaýǵa saiasi partiialar atynan da túse alady», - deidi spiker.
Onyń aitýynsha, Prezident elimizdegi 90% ákimderdi halyq sailaýy tiis degen talap qoidy. 2024 jyldan bastap aýdan ákimderin sailaýǵa kelemiz. Bári sátti ótse sol tájiribemen keleshekte iri qalalar men oblys ákimderin de halyq sailaityn núktege kelýimiz ábden múmkin.
«Meniń oiymsha Prezident bastaǵan bul reforma aldaǵy 4-5 jylda naqty isimen kóringen jańa saiasi liderlerdi halyq aldyna alyp shyǵady. Memlekettik basqarýda praktikalyq tájiribesi, nátijesi, jetken jetistigi bar zamannyń jańa liderlerin qalyptastyrady. Bul protsess aldaǵy 5-6 jylda qoǵamdyq sana men saiasi mádenietti múldem basqa satyǵa kóteretin bolady. Halyq sózdiń emes, istiń adamdaryn birden tanityn deńgeige keledi. Soǵan qarap baǵa beriledi. Prezident bastaǵan aýyl ákimderin sailaý reformasy elimizdi satylap ózgeretin, demokratiia printsipterin myqtap ornatatyn, eń bastysy Qazaqstandy sanaly, órkenietti demokratiiaǵa bastaityn birden bir jol bolady. Realizm solai. Soǵan kele jatyrmyz», - deidi ol.
