QR Ǵylym jáne joǵary bilim ministri Saiasat Nurbek jańa vedomstvonyń qalai qurylǵanyn aityp berdi, dep habarlaidy QazAqparat.
Onyń aitýynsha, Bilim jáne ǵylym ministrlikterin bólý máselesi qoǵamda 2-3 jyldai talqylanǵan.
«Halyqaralyq tájiribede de munyń birneshe úlgisi bar. Máselen, kórshiles Ózbekstanda mektepke deiingi, bilim jáne joǵary bilim boiynsha úsh ministrlik bar. 2018 jyly Resei Federatsiiasy da Joǵary bilim jáne aǵartý ministrligi dep ekige bóldi. Sondyqtan, Prezident búkil usynystardy, sarapshylardyń pikirlerin tyńdap, osyndai sheshim qabyldady. Ótken aidyń basynda ózimdi shaqyryp, osy Ǵylym jáne joǵary bilim ministrligi qurylyp jatqanyn, meniń joǵary bilimge qatysty usynystarym unap júrgenin aitty. Ózderińizge belgili, men Prezident janyndaǵy Ulttyq keńestiń múshesi boldym, onda 2-3 ret kezdesip, kadr daiarlaý, joǵary bilim, qoldanbaly ǵylym jóninde pikirlerimdi aitqan edim. Men birden kelistim, óitkeni qazir Prezidenttiń «Jańa Qazaqstan» tujyrymdamasyn qoldaýymyz kerek», - dedi Saiasat Nurbek QR Prezidenti Teleradiokesheniniń «3 suraq» baǵdarlamasynda.
Sonymen birge, Saiasat Nurbek Prezidentpen kezdesý qalai ótkenin eske aldy.
«Kezdesý óte jaqsy boldy, Prezident kóterińki kóńil-kúide boldy. Biraq jaýapkershilik te óte aýyr ekenin aitty. Esimde qalǵan negizgi oi – «Saiasat, siz «Jańa Qazaqstannyń» jańa ministri bolyp taǵaiyndalyp otyrsyz. Sondyqtan jaýapkershilik sizdiń iyǵyńyzda bolady, júieli problemalar jinalyp qaldy, ǵylymnyń qazirgi mártebesi, ǵalymnyń qoǵamdaǵy orny, laýazymy, ataǵy múldem túsip qaldy. Sondyqtan, ǵylymnyń, ǵalymnyń, professordyń qoǵamdaǵy mártebesin kóterýge basa mán berińiz» dep tapsyrma berdi. Jáne de kadr daiarlaý máselesi – «Jańa Qazaqstannyń» negizgi irgetasy, negizgi basym baǵyty bolǵanyn aityp ketti. Sondyqtan men sol jaýapkershilikti túsinip, alǵysymdy aityp, Prezidenttiń qoldaýyn suradym. Óitkeni, shynynda da qazir jańa júieli reformalardy bastaý da ońai bolmas», - deidi Ǵylym ministri.
Onyń aitýynsha, eski Bilim jáne ǵylym ministrliginen 99 adam Ǵylym ministrligine aýysady.
«Árine bul jetkiliksiz, sondyqtan Premer-Ministr men Ekonomika ministrliginiń qoldaýymen 310 shtatty alyp jatyrmyz. Bul jumys jalǵasady, osy jyldyń sońyna deiin 200-250 adamǵa jetkizemiz (...) Ministr bolǵannan keiin ómir qatty ózgerdi. Kúnde demalyssyz jumys isteimiz. Jańa ministrlik nemese jańa mekeme qurýdyń úsh formaty bar. Birinshi formaty – daiyn ministrlikke, daiyn apparatqa kelý jáne jumysty ári qarai jalǵastyrý. Ekinshi format – múldem jańa mekeme qurý jáne eń qiyny úshinshi formaty eken – jańa ministrlikti qurý jáne eskisinen bólinip ketý», - dedi S. Nurbek.
