Ǵylym jáne joǵary bilim ministri Saiasat Nurbek balalary Kiprde oqýyn jalǵastyratynyn málimdedi. Ol sondai-aq jýrnalisterden osy taqyrypty birjolata jabýdy ótindi, dep habarlaidy Ulysmedia.kz.
Eske sala ketsek, ministrdiń balalary Kiprde oqityny týraly buǵan deiin habarlanǵan edi. Osy jyldyń maýsymynda Úkimet kýlýarynda jýrnalister ǵylym jáne joǵary bilim ministrinen balalary nege Kiprde oqitynyn suraǵan.
«26 maýsymda balalarym Qazaqstanǵa oralady. Sizderge fotomen esep beremin. Ózim de olardy asyǵa kútip júrmin», - dep jaýap bergen bolatyn sol kezde Saiasat Nurbek.
Osydan birneshe kún buryn jýrnalister ministrden “balalaryńyz Kiprden oraldy ma?” dep suraq qoidy. Alaida ministr bul suraqqa jaýap bergisi kelmedi.
«Bul - meniń jeke ómirime qatysty suraq. Atalǵan suraq meniń balalaryma ońai tigen joq», - dedi ol.
Saiasat Nurbektiń sońynan jýrnalister taǵy suraq qoiyp, «Qazaqstannyń bilim sapasyna senesiz be?» dep saýal tastady. Ministr «tolyq senemin» degen. «Endeshe, nege balalaryńyz shetelde oqidy?» degen suraqqa ol jaýap bermei, Úkimet dálizinen asyǵys shyǵyp ketken edi.
Ortalyq kommýnikatsiialar alańynda búgin ótken baspasóz máslihatynda Saiasat Nurbekke bul suraq taǵy qoiyldy.
«Shynynda da, bul suraqqa núkte qoiaiyqshy. Jaǵdai qalai ekenin sizderge túsindireiin. Rasynda da, ýáde etkenimdei, balalarym jazda elge oraldy. Olar 4 jyldan beri shetelde, Soltústik Kiprde jeke mektepte oqidy. Tekserseńizder de bolady. Britandyq jeke mektep. Bilim sapasy ol jerde óte jaqsy. Bizdiń jeke mektepterge qaraǵanda qymbat ta emes», - dedi ol.
Saiasat Nurbek osy másele týrasynda balalarymen durystap áńgimeleskenin, balalary edáýir ósip qalǵanyn, aqyldy ekenin atap ótti.
«Sheteldik mektepterdiń bir jaqsysy, olar balalarǵa ózdigimen oilaýdy, syni turǵyda oilai bilýdi úiretedi. Olar óz tańdaýyn jasady. Men olardyń sheshimin syilaýym kerek. Olar oqýyn Kiprde jalǵastyrǵanymyz jón dep sheshti. Olardyń mektepte tańdaýdaǵy quqyǵy syilai kele, sheshimin qabyldap, kelistim. Qazir meniń barlyq kúsh-jigerim men ýaqytymdy eldegi joǵary bilim, ýniversitet ǵylymyna jumsap jatyrmyn. Sol sebepti meniń jáne balalarymnyń quqyǵyn qurmetteýdi suraimyn. Jumysyma qatysty kez kelgen dialogqa daiynmyn. Kez kelgen synǵa nemese usynysqa ázirmin. Al osy taqyrypty jabýdy usynamyn», - dep túidi sózin Saiasat Nurbek.
