Búgin elordada «Mádeniet, bilim, ǵylym yqpaldastyǵy jáne qazirgi zamanǵy mediakommýnikatsiia» atty halyqaralyq ǵylymi-tájiribelik konferentsiia ótti. QR Parlamenti Májilisiniń depýtaty, kórnekti qalamger Saýytbek Adrahmanovtyń 70 jyldyǵyna arnalǵan jiyn barysynda elimizge tanymal memleket jáne qoǵam qairatkerleri mereitoi iesine qatysty oilarymen bólisti, dep habarlaidy QazAqparat tilshisi.
«Saýytbek Abdrahmanov - Táýelsiz Qazaqstandy qurýǵa jáne onyń rýhaniiat salasyn baiytýǵa ólsheýsiz úles qosqan ardaqty azamattardyń biri, elimizdiń Aqparat ministri, bas basylymnyń basshysy retinde jas memleketimizdiń tarihynda qalǵan tulǵa. Sáýkeń jemisi mol 70 jasqa memleket jáne qoǵam qairatkeri, saliqaly saiasatker, qarymdy qalamger atanyp, abyroimen jetti. Shyǵarmashylyǵy laiyqty baǵalanyp, memlekettik syilyq ielendi. El-jurttyń aldynda bedeldi halyq qalaýlysyna ainaldy. Aýdarmanyń qyr-syryn, Pýshkin týyndylarynyń tabiǵatyn zerttep, ádebiettanýshy ǵalym atandy. Sóziniń salmaǵy bar, isiniń ónegesi bar Sáýkeńdi qurmettep, búgingidei halyqaralyq konferentsiia ótkizý óte oryndy dep sanaimyn», - dedi is-sharany ashqan QR Memlekettik hatshysy Qyrymbek Kósherbaev.
Qyrymbek Kósherbaev mereitoi iesin álemniń 61 memleketin aralap, qyzyqty reportajdar men ocherkter jazǵanyn, kóptegen memleket basshylarymen suhbat qurǵanyn, aýdarma salasynda da qarymdy eńbek etkenin atap ótti.
«Sáýkeń – synshy. Kinonyń da, ádebiettiń de synshysy. Keide memlekettik qyzmetshilerge de syn kózben qaraitynyn baiqaimyz. Maqtap otyryp, maqtamen baýyzdaityn sóz zergeriniń oryndy syny men oily maqalalary tutas salanyń keńeiýine súbeli úles qosty», - dep atap ótti Memlekettik hatshy.
Al memleket jáne qoǵam qairatkeri Myrzatai Joldasbekov Saýytbek Abdrahmanovtyń mádenietti, inabatty, kishipeiil, bilimdi, jaza da alatyn, aita da alatyn tereń oidyń adamy, kórnekti tulǵa ekendigin atap ótti.
«Sabyrly, baisaldy, syily azamat, úlken parasat iesi, belgili memleket qairatkeri. Qazaqstan ortalyq partiia komitetinde, keiin Úkimette Ábish, Imanǵali, Qyrymbek, Tólen, Álibek, Saýytbek - bárimiz birge qyzmet ettik. Jaqsy jyldar edi. Qiyn bolsa da esimizde qaldy. Aǵaly-inili boldyq. Saýytbek búginde - depýtat, kórnekti jýrnalist, belgili ádebietshi ǵalym, memlekettik syilyqtyń iegeri. Maqtaýǵa da, maqtanýǵa da turatyn úlken azamat», - dedi Myrzatai Joldasbekov.
QR Prezidentiniń keńesshisi, QR UǴA akademigi Baýyrjan Omarov bolsa mereitoi iesin iýmorǵa toly sózimen quttyqtap, is-shara qatysýshylarynyń kóńilin kóterdi.
«Saýytbek Abdrahmanov - anyqtaýshysy alty aýyz sózdi quraityn eleýli esim, qarymdy qalamger, qajyrly qairatker, saliqaly saiasatker, mańǵaz memlekettik qyzmetshi, dańqty depýtat, shiraq sheneýnik, mártebeli ministr, aibarly aqparatshy, azýly apparatshy, alymdy aýdarmashy, áleýetti ádebiettanýshy, parasatty Pýshkintanýshy. Osy áserli epitetterdiń bári onyń ómir jolynyń ár tusyn órnekteidi. Endi mine oǵan búgin 70-tegi jigit degen tamasha tirkes qosyldy. Ómir bar jerde iýmor bar. Sol iýmordan mereitoi iesiniń ózi de kende emes. Iýmordy sezinbegen adam ómirdi sezinýden qalady. Sondyqtan jyly lebizimizdi jarasymdy iýmorǵa bólep otyryp, sizdiń erekshe qasietterińizdi sanamalap kóreiik. Er jigitke keregi baq pen bap. Sonyń sizde ekeýi de bar. Bastaǵy baǵyńyz ben úidegi babyńyz ózińizdi únemi alǵa jetektep keledi. Búkil aqparat quraldarynyń jiyntyq ataýy retindegi óńkei bas árippen jazylatyn BAQ-ta sizden ajyraǵan joq. Endeshe túrli árippen jazylatyn túri baqtaryńyz sizge serik bola bersin! Baǵyńyz da, babyńyz da qatar órlei tússin: Tek iýmordy keremet túsinseńiz de, sol iýmordy aitqanda onsha qatty kúlmeitindigińiz, kúlip bola sala ezýińizdi tez jinap alatynyńyz, bir qaraǵan adamǵa sál sýyqtaý kórinetindigińiz, ózińizdi asa qatty bilińkiremeitin jannyń kózimen zer salǵanda eptep qana syzdanyp, azdap qana muzdanyp turatyndyǵyńyz bolmasa, jalpy óte meiirimdi adamsyz», - dep ázilge burdy Baýyrjan Omarov.
«Elimizdiń, halqymyzdyń qazirgi qalamgerleri ishinde orny bólek Saýytbek Abdrahmanulymen biraz jyldan beri joldaspyz. Sákeńniń qalamgerlik dárejesine baǵa berýden aýlaqpyn. Áitse de, oilanyp oqityn oqyrmandarynyń biri retinde baspa betine shyqqan kitaptaryn, maqalalaryn minberden sóilegen sózderin oqyp, tyńdaǵanda erekshe áser alatyndardyń birimin. Abai babamyz: «ózin alma, sózin al» degen eken. Saýytbek Abdrahmanuly - ózin de, sózin alýymyz kerek azamat», - dep atap ótti óz kezeginde memleket jáne qoǵam qairatkeri Baqtyqoja Izmuhambetov.
L.Gýmilev atyndaǵy EUÝ rektory Erlan Sydyqov ult ziialylarynyń «Mádeniet – Qudaidan keiingi zor kúsh» degen danalyǵyn qalamger, ǵalym Saýytbek Abdrahmanov zamanǵa sai salalandyrýǵa, daralandyrýǵa atsalysqanyn basa aitty.
«Birinshiden, Sáýkeń aqparat salasynyń úzdigi, sheber uiymdastyrýshy ǵana emes intelektýaldyq buqaralyq aqparat quraldarynyń baǵyn ashqan qalamger desek, artyq aitqan bolmaidy. Ekinshiden, Saýytbek Abdrahmanuly mádeniet yqpaldastyǵynyń iri mamany, kásibi zertteýshisi, aýdarmashylyǵy taǵy bar. Úshinshiden, Sáýkeń shyǵarmashylyǵyn sipattaityn tapqyrlyq, sheshendik, oraily iýmor jastar úshin asa qajet qasiet dep bilemin. Tórtinshiden - Saýytbek Abdrahmanuly Qazaqstan halqy Assambleiasynyń beldi jáne jetekshi ókili, qazaq ulty men etnostardyń birlikte damýynyń jankúieri. Besinshiden - Sáýkeń tamasha dárisshi, parasatty professor. Bilim alýshylar Abdrhamanov dárisin izdep júrip tyńdaidy», - dedi ýniversitet basshysy.
Konferentsiia barysynda Saýytbek Abdrahmanovtyń «Eldik erligi» atty bes tomdyq pýblitsistikalyq shyǵarmalarynyń tusaýkeseri ótti.
Sonymen qatar mereitoi iesine «Gýmilev atyndaǵy Eýraziia ulttyq ýniversitetiniń qurmetti professory» ataǵy berildi.
