QR Joǵarǵy soty saýnada demalǵan aýdandyq sot tóraǵasyna qatysty qyzmettik tekserýdiń alǵashqy nátijesimen bólisti, dep habarlaidy QazAqparat.
«Sýdialardy laýazymynan alý jáne tártiptik jaýapkershilikke tartý tártibi «Qazaqstan Respýblikasynyń sot júiesi jáne sýdialardyń mártebesi týraly« QR Konstitýtsiialyq zańymen retteledi. Sýdialardy teris qylyǵy boiynsha qyzmetinen alý birneshe kezeńmen júzege asyrylady. Birinshiden, naqty jaǵdai boiynsha Sýdia ádebi jónindegi komissiia sýdia áreketinde Sýdia ádebi kodeksin buzý faktisiniń bolýy týraly qorytyndy shyǵarýmen tekserý júrgizedi. Tártip buzýshylyq anyqtalǵan jaǵdaida oblystyq sottyń barlyq sýdialarynyń qatysýymen ótetin jalpy otyrysta Joǵarǵy sot keńesi janyndaǵy Sot tóreligine sýdiany tártiptik jazaǵa tartý úshin materialdardy jiberý týraly másele jasyryn daýys berý arqyly sheshiledi», - dedi QR Joǵarǵy soty baspasóz qyzmetiniń jetekshisi Aidos Sádýaqasov.
Onyń atap ótýinshe, buǵan qosa sýdia Sot tóreliginiń ózin tártiptik jazaǵa tartý týraly sheshimine qatysty Joǵarǵy sot keńesine shaǵym jasai alady. Sodan keiin ǵana Joǵarǵy sot keńesi túpkilikti sheshim qabyldaidy.
«Almaty oblystyq sotynyń Sýdia ádebi jónindegi komissiiasy Almaty oblysy Kerbulaq aýdandyq sotynyń tóraǵasy D.Seiitovtiń monsha kesheninde bolý faktisine qatysty tekserý júrgizdi. Tekserý materialdaryn komissiia qarady. Komissiia Almaty oblysy Kerbulaq aýdandyq sotynyń tóraǵasy D.Seiitovtiń Sýdia ádebi kodeksin buzý faktisin anyqtady. Búgingi kúni D.Seiitovke qatysty material Almaty oblystyq sotynyń jalpy otyrysynyń qaraýynda jatyr», - dedi Aidos Sádýaqasov.
Esterińizge sala ketsek, osydan biraz ýaqyt buryn prokýror men sot tóraǵasynyń kásipkermen birigip saýnada demalyp júrgen videosy áleýmettik jelige taraǵan bolatyn. Beinejazbada videony túsirip turǵan avtor óziniń sot tóraǵasymen saýnada demalyp jatqanyn baiandaidy.
