Nur-Sultan qalalyq qoǵamdyq densaýlyq saqtaý basqarmasynyń basshysy bolǵan Sáýle Qisyqova jańa qyzmetke taǵaiyndaldy, dep habarlaidy "Ult aqparat".
Sáýle Qisyqovanyń qyzmetinen ketkenin buǵan deiin Nur-Sultan qalalyq qoǵamdyq densaýlyq saqtaý basqarmasy rastaǵan bolatyn.
«Onyń mindetin ýaqytsha Áliia Rústemova atqarady», - dep habarlady basqarmanyń baspasóz qyzmetinen.
Al Nur-Sultan qalasynyń ákimdiginiń baspasóz qyzmeti jańa ǵana Sáýle Qisyqovanyń Qazaqstan Respýblikasy Prezidenti Is basqarmasy Meditsinalyq ortalyǵynyń basshysy qyzmetine taǵaiyndalǵanyn jariialady.
Aita ketsek, Sáýle Qisyqova Nur-Sultan qalalyq qoǵamdyq densaýlyq saqtaý basqarmasyna týra úsh jyl jetekshilik etken. Basqarma basshylyǵyna 2017 jyldyń shilde aiynda taǵaiyndalǵan.
Sáýle Qisyqova 1963 jyly 22 shildede dúniege kelgen. Almaty memlekettik meditsina institýtynyń túlegi. Meditsina ǵylymdarynyń doktory, iskerlik ákimshilik magistri.
Eńbek jolyn 1987 jyly Almaty oblysynyń Ortalyq aýdandyq aýrýhanasynda bastaǵan. 1994 jylǵa deiin sonda dáriger-terapevt bolyp jumys istedi.
1994 jyldan 2004 jylǵa deiin Almaty qalasyndaǵy №8 qalalyq emhananyń emdeý-profilaktikalyq jáne aqyly bóliminiń meńgerýshisi boldy. Al 2004-2007 jyldar aralyǵynda Almaty qalasyndaǵy «Qazaqstan Respýblikasy Prezidentiniń Is basqarmasy Meditsinalyq ortalyǵynyń ortalyq klinikalyq aýrýhanasy» RMK otbasylyq meditsinalyq keshender qaýymdastyǵynyń jetekshisi bolyp eńbek etti. 2007-2012 jyldary sol aýrýhananyń bas dárigeriniń uiymdastyrý-ekonomikalyq máseleleri jónindegi orynbasary boldy. 2015 jyldan bastap 2017 jylǵa deiin «Qazaqstan Respýblikasy Prezidentiniń Is basqarmasy Meditsinalyq ortalyǵynyń aýrýhanasy» respýblikalyq memlekettik kásiporny basshysynyń birinshi orynbasary bolsa, keiin Aqmola oblysy densaýlyq saqtaý basqarmasynyń bastyǵy bolyp eńbek etti.
