Koronavirýs vaktsinatsiiasyna qarsylyq bildiretin adamdardy kóbinde farmatsevtikalyq firmalar qarjylandyrady. Nur-Sultan qalasynyń Kópbeiindi meditsinalyq ortalyǵy direktorynyń orynbasary Sáýle Atyǵaeva osyndai oi aitty, dep habarlaidy QazAqparat.
Elorda ákimdigi uiymdastyrǵan «dóńgelek ústel» barysynda Sáýle Atyǵaeva vaktsina alǵan adam men almaǵan adamnyń ómirin salystyryp qaraýdy usyndy.
«Elimizdegi ár adam meditsinalyq uiymǵa nemese arnaiy pýnktke baryp ómiriniń 30 minýtyn vaktsina alýǵa bóle alady dep oilaimyn. Óitkeni bul jumys óte jaqsy pysyqtalǵan. 30 minýttan artyq ýaqyt shyǵyndamaisyz. Osy 30 minýttan keiin qalypty alańsyz ómirge oralýǵa bolady. Taǵy 21 kún ótkennen keiin - ekinshi 30 minýtty qisa boldy. Antidene osylai qalyptasady. Vaktsina alǵannan keiin keibir adamdar aýyrsyný sezinýi múmkin. Biraq mundai áserler 1-2 kúnnen aspaidy. Iaǵni óz densaýlyǵyńyzdy úlken qaterge tikkenshe, vaktsina alǵan áldeqaida aqylǵa qonymdy», - deidi maman.
Ol óziniń tájiribesinde buǵan deiin eki indetpen betpe-bet kelgenin, vaktsinanyń ol indetterdi qalaisha toqtatqanyn baiandap berdi.
«Men muny sizderge 28 jyl eńbek ótili bar infektsionist dáriger retinde aityp otyrmyn. Men 1994-95 jyldary difteriianyń órshigenin kórgen adammyn. Ol kezde de túgel otbasylardy kómgenimiz esimde. Meditsinanyń arqasynda, vaktsinanyń arqasynda ol indetti de jeńgen bolatynbyz. Sodan beri 25 jyl ótti. Difteriianyń birde-bir jaǵdaiyn kezdestirgen joqpyn.
Tipti qyzylshaǵa qarsy balalar vaktsinasy bolmaǵan kezdi de kórdik. Vaktsina tabylǵannan beri onyń da órshigenin kórgen joqpyz. Sondyqtan ekpege qarsy adamdardy tyńdaýdyń keregi joq», - degen Sáýle Atyǵaeva vatsinaǵa qarsy úgit-nasihattyń artynda dári-dármek saýdasynyń lobbii turýy múmkin degen pikir bildirdi.
«Bálkim olarǵa adamdardyń aýyrǵanyn, kóz jumǵanyn kórý qýanysh syilaityn shyǵar. Kóp jaǵdaida ekpege qarsy adamdardy farmatsevtikalyq firmalar qarjylandyratyn bolyp shyǵady. Olarǵa aýrý kóp tarasa, dári shyǵarýǵa múmkindik týady. Aýrýdy anyqtaý úshin diagnostika jasaý da tabys kózi bolyp kórinetin shyǵar. 30 minýt ýaqyt bólip, ómirge senimdi qadam basý durys pa? Álde aman qalýy ekiushty kúide, kúdikpen ómir surý durys pa? Árkim ózi sheshýi kerek», - dedi dáriger.
Atalǵan sharada Sáýle Atyǵaeva koronavirýstan kóz jumaǵan adamdardyń týystyrynyń basty ókinishin aitty.
