Qazaqstandyqtar karantin kezinde tólem kartalaryn kóp qoldanǵan joq, dep habarlaidy "Ult aqparat" Ulttyq bankke silteme jasap.
2020 jyldyń qańtar-sáýir aiy aralyǵynda tólem kartochkalaryn paidalanýshylar 12,3 trln teńge somasyna 714,6 mln operatsiia júrgizdi. Bul ótken jyldyń sáikes kezeńimen salystyrǵanda somasy boiynsha 53%-ǵa, al sany jaǵynan 72%-ǵa artyq.
«Qolma-qol aqshasyz júrgizilgen operatsiialardyń jalpy kórsetkishtegi bóligi 2019 jyldyń sáikes kezeńindegi 39%-dan 62%-ǵa deiin ulǵaiǵan. Alaida, aǵymdaǵy jyldyń sáýir aiynda naýryz aiymen salystyrǵanda tólem kartochkalary arqyly júrgizilgen operatsiialar kóleminiń 21%-ǵa azaiýy baiqaldy. Qolma-qol aqshasyz júrgizilgen operatsiialar 18%-ǵa, al qolma-qol aqsha sheshý operatsiialarynyń kólemi 25%-ǵa qysqarǵan. Bul eldegi karantin sharasyna bailanysty bolyp otyr», – dep habarlady Ulttyq bank.
2020 jyldyń qańtar-sáýir ailary aralyǵyndaǵy qolma-qol aqshasyz operatsiialar kólemi men sany - 7,6 mlrd. teńge somasyna 615,3 mln. tranzaktsiiany qurady.
«Ótken jyldyń osyndai ýaqyty aralyǵynda budan eki ese az operatsiia júrgizilgen bolatyn. Negizinen qolma-qol aqshasyz operatsiialar onlain kanaldar boiynsha jasalǵan: bankterdiń onlain júieleri arqyly kúnine ortasha eseppen 48,7 mlrd teńge somasyna 2,6 mln operatsiia júrgizilgen. Tólem kartochkalaryn ustaýshylar kúnine ortasha eseppen 5,1 mln qolma-qol aqshasyz jáne 827 myń qolma-qol aqsha sheshý operatsiialaryn ótkizgen. Bir qolma-qol aqshasyz operatsiianyń ortasha somasy 12 298 teńgeni qurasa, qolma-qol aqsha sheshý operatsiialarynyń ortasha somasy 47 598 teńgeni quraǵan»,– dep atap ótti banktegiler.
