14 qyrkúiek kúni Saýd Arabiiasyndaǵy Abkaik munai óńdeý kásiporny men Hýrais munai ken ornynda eki márte bolǵan shabýyl saldarynan keiin munai baǵasy sharyqtap ketti, dep habarlaidy BBC agenttigi.
Shabýyldar munai qondyrǵylaryna zaqym keltirip, ony óndirý toqtatyldy. Munda álemdik jetkizilimderdiń 5% astam bóligin quraityn munai óndiriledi.
Brent markaly munaidyń baǵasy 10% artyp, barreline 66,28 dollardy qurady. Al West Texas Intermediate markaly munaidyń baǵasy 8,9% ósip, Aziia birjasynda 59,75 dollar boldy.
AQSh Prezidenti Donald Tramp AQSh-tyń munai qoryn paidalanýǵa ruqsat bergennen keiin baǵa birshama arzandady.
Saýd Arabiiasynyń munai shyǵarý ónerkásibiniń dál ortasyndaǵy ken ornyna jáne munai óńdeý zaýytyna jasalǵan shabýyl - álemdegi eń iri munai óńdeý zaýytyna tigizgen iri soqqy boldy.
BBC málimetinshe, zaqymdanǵan nysandardyń jumysyn tolyqtai qalpyna keltirýge birneshe apta kerek. Memlekettik Saudi Aramco munai alpaýyty shabýyldar óndiristi kúnine 5,7 mln barrelge qysqartqanyn málim etti.
AQSh memlekettik hatshysy Maik Pompeo ótken senbide bolǵan joiqyn shabýyldy Tegeran uiymdastyrnýy yqtimal dedi. Alaida eshqandai dálel keltirmedi. Sondai-aq, ol iemendik kóterilisshiler jaǵdaiǵa kináli degen qaýesetti joqqa shyǵaryp, shabýyldardyń Iemennen bjasalǵany jóninde dáleldiń joqtyǵyn atap ótti.
Iran AQSh-ty «jalǵan málimeti úshin» aiyptady.
Saýd Arabiiasy Koroldigi álemdegi iri munai eksporttaýshy. Ol kúnine jeti millionnan astam barrel munai jetkizedi. Resmi málimetterge sáikes, Saýd Arabiiasynyń biylǵy maýsym aiyndaǵy munai qory 188 mln barreldi quraǵan.
«Abkaik pen Hýraistaǵy munai nysandaryna keltirilgen zalal kólemi úlken, sondyqtan munai jetkizilimin qaita qalpyna keltirý úshin birneshe apta ketýi múmkin», - dedi Londondaǵy Interfax Energy analitikalyq bóliminiń basshysy Abhishek Kýmar.
Saýd Arabiiasy osy aptada esportty qalypty rejimde ustaý úshin munai qoryn jumsaidy dep kútilýde.
