Elordada «Ýaqyp» korporativtik qaiyrymdylyq qorynyń tanystyrylymy bolyp ótti, dep habarlaidy "Ult aqparat" QR Din isteri jáne azamattyq qoǵam ministrligine siltem jasap.
Shara barysynda «Ýaqyp» qaiyrymdylyq qory qamqorshylar keńesiniń tóraǵasy, ministr Nurlan Ermekbaev sóz sóilep, Qazaqstanda igilikti, saýapty ister jasaýǵa nietti adamdardyń qatary kóbeiip kele jatqanyn basa aitty.
«Din jolynda «saýapty is» jasaý úshin tek qana meshit salý mindetti emes. Qoǵam úshin paidaly bolyp esepteletin kez-kelgen igilikti isti jasaýǵa bolady. Onyń ishinde mektepter, aýrýhanalar, jol salý, kópir salý sekildi qoǵamǵa paidaly kez kelgen is saýapqa jatady. Qordyń jumysy atalǵan máseleni sheshýge baǵyttalǵan. Ol qaiyrymdylyq jasaý jolyndaǵy isterdi tiimdi júiege salýǵa úles qosady. Eń bastysy - bári ashyq jáne qoǵam úshin paidaly bolýy tiis», - dedi Nurlan Ermekbaev.
Qordyń qarajaty dini ǵimarattar men áleýmettik nysandardy salýǵa, dini qyzmetkerler men kedeilerge, jumyssyzdar men múgedekterge qoldaý kórsetýge arnalǵan jobalardy iske asyrýǵa baǵyttalady.
N. Ermekbaevtyń aitýynsha, mundai mekemeler qaiyrymdylyq jasaý dástúrleri qalyptasqan kóptegen elderde keń taralǵan. «Vakf» Institýty musylman elderiniń halyqtary arasynda keńinen qoldanylady, sondai-aq arnaiy qurylǵan «Vakf» ministrlikteri de jumys isteidi. Atalǵan júie qazirdiń ózinde Taiaý Shyǵystaǵy islam elderinde ǵana emes, sonymen qatar zaiyrly memleketterde de júzege asyrylýda. Mysaly, Resei Federatsiiasynyń keibir óńirlerinde, Qyrǵyzstan men Túrkiiada bar.
Is-shara sońynda «Ýaqyp» Qory men «Al Sakr Finans» AQ, «Astana Banki» AQ arasyndaǵy yntymaqtastyq týraly memorandýmdar bekitilip, metsenattar qaiyrymdylyq kómek kórsetýge ýaǵdalasty.
