Prezident Qasym-Jomart Toqaevtyń «Egemen Qazaqstan» gazetinde jariialanǵan «Táýelsizdik bárinen qymbat» atty maqalasynda kókeide júrgen dúnieler dóp basyp aitylǵan. Mundai pikirdibelgili kinorejisser, kinostsenariishi, jazýshy, QR eńbek sińirgen qairatkeri Satybaldy Narymbetov bildirdi, dep habarlaidy QazAqparat.
«Maqaladaǵy tushymdy oilardy el basqaryp otyrǵan azamattyń aitýy – bizge úlken demeý. Bul máselelerdi qoǵam belsendileri de kóterip júr. Degenmen Prezident Qasym-Jomart Toqaev mańyzdy taqyryptarǵa toqtalyp, kókeide júrgen dúnielerdi dóp basyp aitty. Ásirese, ózim talai jyldar eńbek etken kino salasyna qatysty óte jaqsy bastama kóterildi. Biz tarihi týyndylardy qolǵa alsaq, kópshiligi «Nege únemi tarihi kinolar túsire beremiz?» dep narazylyq tanytady. Kerisinshe Gollivýd siiaqty boevik filmderdi kóptep túsirýimizdi suraidy.
Biz osydan 30 jyl buryn Táýelsizdik alyp, el bolyp, irgetasymyz qalandy. Bul asa kóp ýaqyt emes. Qazir qoǵamda ózin-ózi taný úrdisi júrip jatyr. Iaǵni, bul – tarihi derekter negizinde ózimizdi tanyp, osynyń arqasynda jastardy tárbieleý protsesi.
Meniń stýdent kezimde «Qazaqstan tarihy» degen shaǵyn qońyr kitap bolatyn. Oǵan tek 1917 jyldan bergi qazaq halqynyń bastan ótkergen saiasi-áleýmettik oqiǵalary toptastyrylǵan. Al bizdiń ulttyń tarihy tereńnen bastaý alady. Degenmen onyń birazy umytyldy. Sondyqtan ult tárbiesi jolynda mańyzdy ról atqaratyn kino óneri arqyly osy burmalanǵan tarihty qaita qalpyna keltirýimiz qajet. Osynyń negizinde jastarǵa durys baǵyt kórsete alamyz», - dedi Satybaldy Narymbetov.
Kinorejissiordiń pikirinshe, jyl saiyn keminde bir tarihi film túsirilýi qajet. Osy maqsatta «Ulttyq kinony qoldaý memlekettik ortalyǵynyń» sarapshylar keńesi taiaýda bas qosyp, tarihi kinolarǵa basymdyq berý máselesin talqylaýdy josparlap otyr.
«Tarihi filmderge kóbirek qarajat bólýge tyrysýymyz kerek. Máselen, L.N.Gýmilev siiaqty ataqty tarihshylar qazaq dalasyna saiahat jasap, ultymyzdyń tarihyn dáiekti derekter keltire otyryp jazyp ketti. Ony Gýmilev qazaqtarǵa jaǵyný úshin emes, jastar osynyń negizinde shynaiy tarihty oqysyn degen niette jasaǵan. Al biz qazirgi tańda bar dúnieni kórsete almai otyrmyz. Sondyqtan Prezidenttiń bul baǵytqa basa nazar aýdarýy oryndy jáne kino salasyna serpilis bermek», - dep atap ótti QR eńbek sińirgen qairatkeri.
Sondai-aq Satybaldy Narymbetov sońǵy ýaqyttarda qazaq halqynyń tarihy týraly film túsirýge niet bildirgen sheteldik kinokompaniialardyń qatary artqanyn atap ótti. Alaida sheteldik kino salasynyń mamandary túsirilim úshin qomaqty qarjy talap etedi.
.jpeg)