Foto: https://www.facebook.com/rinat.rafkhat
Almaty garnizonynyń áskeri soty biyl mamyrda áskeri gospitalge túsip, aýrýhanada kóz jumǵan qatardaǵy jaýynger Dosymjan Sálimjannyń isi boiynsha úkim shyǵardy, dep habarlaidy Azattyq Rýhy.
Áskeri bólimdegi leitenant Janbota Shákirovke «bilikti asyra paidalandy» degen aiyp taǵylyp, 7 jylǵa bas bostandyǵynan aiyryldy. Qoǵam belsendisi Rinat Rafhat bul týraly áleýmettik jelide jazdy.
«Áskerdegi álimjettiktiń saldarynan aýrýhanaǵa túsip, 10 kúnnen keiin kóz jumǵan jas sarbaz Dosymjan Sálimjannyń isi boiynsha aiyptalǵan leitenant Shákirov QK 451-bap «Bilikti asyra paidalaný» 2-tarmaǵymen 7 jyl bas bostandyǵynan aiyryldy», - dep jazdy ol.
Janbota Shákirov sotta marqumnyń ata-anasynan keshirim surady.
Eske salsaq, 2024 jylǵy 13 mamyrda Saryózek kentindegi 29108 áskeri bóliminiń merzimdi qyzmettegi qatardaǵy jaýyngeri 19 jastaǵy Dosymjan Sálimjannyń qaitys bolýyna bailanysty qylmystyq is qozǵalǵan bolatyn.
