QR Parlamenti Májilisiniń depýtaty Aidos Sarym qoǵamda sońǵy ýaqytta qyzý talqylanyp jatqan kiberbýlling taqyrybyna qatysty oiyn ortaǵa saldy, dep habarlaidy QazAqparat.
«Biz barlyq iri áleýmettik jeliler óz filialdaryn Qazaqstanda mindetti túrde tirkeýi, resmi ókili men keńsesiniń bolýy týraly birshama qatań talap qoidyq. Osydan keiin zań jobasynyń jáne tutastai alǵanda qoǵamda ne bolyp jatqanyn túsinýdiń evoliýtsiiasy artty. Birinshiden, Úkimet áleýmettik jeli naryǵyndaǵy iri oiynshylarmen birneshe mańyzdy kelissóz júrgizdi. Men ózim sol kelissózderdiń keibirine qatystym. Meniń oiymsha, iri tehnogiganttar máseleniń mán-jaiyn túsinip otyr. Olar engizilgeli otyrǵan norma úshin alańdap otyrǵan joq», - dedi Aidos Sarym.
Onyń aitýynsha, álemdik deńgeidegi iri áleýmettik jeliler ákimshiligi kiberbýlling máselesine túsinistikpen qaraidy.
«Kerisinshe bizdiń alańdaýshylyǵymyzdy túsinip, yntymaqtasyp áreket etýge daiyn ekendikterin jetkizdi. Ulttyq zańnama talaptarynda balalar taǵdyry men kiberbýlling máselesi ǵana kóterilmegen. Zańnama ishine lańkestik, ekstremizm, esirtkimen kúres, pedofiliia jáne taǵys basqa máseleler kiredi. Al joǵaryda atalǵan máselelermen kúres talaptary áleýmettik platformalardyń erejelerine sáikes keledi», - deidi ol.
Sondai-aq, Májilis depýtaty Qazaqstannyń quzyrly organdary men internet-platformalar ókilderi arasynda turaqty dialogtyń bolýy kerektigin atap ótti. Sol siiaqty Úkimet jarty jyldyń ishinde ózara is-qimyl tetikterin retteýi tiis.
Odan bólek, Aidos Sarymnyń pikirinshe, elimizde qandai da bir áleýmettik jelini buǵattaý týraly jospar bolǵan emes.
