Túrkistan qalasynyń politsiia basqarmasyna basshylyq qyzmetke polkovnik Baýyrjan Seltanov kelgeli oblys ortalyǵynda jaǵdai turaqtanǵan. Bul jaiynda oblystyq politsiia departamentiniń baspasóz qyzmeti resmi málimet taratty, dep habarlaidy "Ult aqparat".
PD baspasóz qyzmetiniń málimetinshe, kieli shaharda ákimshilik quqyq buzý sany azaiyp, qylmystardyń, onyń ishinde qoǵamdyq oryn men kóshedegi qylmystyń ashylý kórsetkishi jaqsarǵan.
Sondai-aq, qalalyq politsiia basqarmasy basshylyǵynyń bastamasy boiynsha turaqty negizde jeke quram arasynda tártipti arttyrý jáne politsiianyń keibir arsyz qyzmetkerlerinen politsiia qatarlaryn tazartý boiynsha jumystar júrgizilýde.
Aita keteiik, áleýmettik jelilerde Ordabasy aýdandyq politsiia bóliminiń burynǵy basshysy, politsiia polkovnigi Baýyrjan Seltanov 2018 jyly Abai aýylynda zorlanǵan 7 jasar bala oqiǵasyna qatysy bolýy múmkin degen jalǵan aqparat taraǵan bolatyn.
Alaida óńirdiń politsiia departamenti bul aqparlardy joqqa shyǵardy.
«Departament tarapynan Baýyrjan Seltanovtyń politsiiadan qýylǵany jaily aqparatty joqqa shyǵaramyz. Abai aýylyndaǵy jaǵdaidan keiin ol Ordabasy APB bastyǵy laýazymyna aýystyrylǵan. Sonymen qatar, quqyq qorǵaý organdarynyń múddeli ókilderi politsiia polkovnigi B.Seltanovqa qatysty QR QK 362-babynyń 1-bóligi «qyzmet babyn teris paidalaný» boiynsha 2018 jyly jan-jaqty tekserý júrgizgen. Politsiia polkovnigi B.Seltanovqa qatysty aitylǵan ýáj óz dálelin tappaǵan edi. 2020 jylǵy naýryzda QR Ishki ister ministrligi basshylyǵynyń kelisimimen Túrkistan oblysy PD bastyǵy, politsiia general-maiory Q.Dálbekovtyń buiryǵymen Túrkistan qalasy politsiia basqarmasynyń bastyǵy qyzmetine Baýyrjan Seltanov taǵaiyndaldy» delingen habarlamada.
