Túrkistan oblysy, Saryaǵash aýdanynyń sharýalary úi mańyndaǵy jerdi tiimdi paidalanýda. Biri aýlasyna kókónis daqyldaryn ekse, endi biri tropikalyq jemis limon ósirýge bolatynyn dáleldeýde, dep habarlaidy «Ult aqparat» oblys ákimdiginiń baspasóz qyzmetine silteme jasap.
Osyǵan orai, aýdannyń kásipkerlik jáne aýyl sharýashylyǵy bóliminiń basshysy A.Amirhanov Aqjar aýyldyq okrýgi, Baǵys eldi mekeniniń turǵyny Tansyqbaev Manatáliniń «Daian» sharýa qojalyǵyna arnaiy baryp, limon sharýashylyǵymen tanysyp qaitty.
Búgingi tańda kásipker óziniń sharýa qojalyǵyna tiesili 60 sottyq jylyjaiynda «Meir» surypty limon ósirýde.
«Jyldyq kóshettiń alǵashqy eki jylynda gúlderin terip alyp tastaý qajet, sóitip onyń boiyn ósirýge kúsh salý kerek. Osy ádisti qoldanǵanda úshinshi jyly kóshet 20 keli, tórtinshi jyly 50 keli ónim bere bastaidy. Jyl ótken saiyn berer jemisi de molaia túsedi. Qazirgi tańda jylyjaidaǵy limon aǵashtarynan 50-60 tonna ónim jinalýda», dedi kásipker.
Limon butaqtarynan jinalǵan ónim ishki naryqta saýdalanyp jatyr.
Sonymen qatar jylyjaida limon ósirgisi keletinder kásipkerden qalamshadan ónip shyǵatyn limon kóshetterin alyp ketýde. Kásip bastaǵysy keletinderge aqyl-keńesin aityp, tájiribesimen bólisýge daiyn Tansyqbaev Manatáli limon kóshetin ózinen alǵandarǵa osylaisha sharapatyn tigizbek.
Búgingi tańda aýdanda jalpy 683,2 ga jylyjai ornalasqan. Biyl osy jylyjailardan 95,0 myń tonnadan astam ónim jinaldy.
