Túrkistan oblysynyń Saryaǵash aýdanyndaǵy «Jibek joly» keden beketindegi úsh myńnan astam Ózbekstan respýblikasynyń azamaty eline ótkizildi. Kórshi eldiń azamattary birneshe kúnnen beri shekara asa almai, keden beketiniń mańynda aialdaǵan bolatyn, dep habarlaidy QazAqparat.
Saryaǵash aýany ákimdiginiń málimetinshe, ózbekstandyqtar sońǵy eki táýlikte keden beketinen ótkizilgen. Qazir bul bekettiń mańyndaǵy avtoturaqta tek 40-qa jýyq Tájikstan azamaty túnep qalǵan.
«Aýdan ákimdiginiń uiymdastyrýymen eline óte almai turǵan azamattarǵa eriktiler jáne demeýshiler tarapynan bir rettik ystyq tamaq, basqa da qajetti zattar berilip, tiisti kómekter kórsetilip keledi. Jas balalary bar jáne júkti áielder sol mańdaǵy qonaq úilerge ornalastyrylyp, olarǵa barlyq jaǵdai jasalyndy. Ýaqytsha aýmaqtyń tazalyǵy kúndelikti júrgizilip, ár joly jinalǵan azamattar shekaradan ótkizile sala dezinfektsiialaý jumystary júrgizilip keledi. Karantin bastaǵan naýryz aiynan búgingi kúnge deiin Ózbekstan Respýblikasynyń 47 489, Tájikstan Respýblikasynyń 1 554 azamaty elderine ótkizilgen» delingen habarlamada.
Aita keteiik, kúni keshe óńirdegi epidemiologiialyq jaǵdaiǵa bailanysty brifing bergen Túrkistan oblysynyń ákimi Ómirzaq Shókeev osy máselege toqtaldy. Aimaq basshysy naýryz aiynan beri jalǵasyp kele jatqan másele ózekti bolyp otyrǵanyn aityp ótti.
«Ózbekstandaǵylar azamattaryn shekaradan ótkizý úshin karantindik tósek oryndary jetkiliksiz ekenin, sol sebepten ózkize almai otyrǵanyn aitqan bolatyn. Bizge bul másele árine úlken aýyrtpashylyq túsirip jatyr. Bul jerde keide ákimshilik qyzmetkerleri, keide QHA tarapynan ystyq tamaqtar uiymdastyryldy. Keide demeýshiler qol ushyn sozýda. Keden beketinde jinalǵan úsh myńǵa tarta adamǵa jaǵdai jasaý ár túrli tásildermen sheshildi, bul jumystar áli de jalǵasady. Biz bul máseleni úkimettik deńgeide kóterip jatyrmyz. Bizde eki usynys bar. Birinshisi - shekaranyń arǵy jaǵynda tranzittik aimaq bar, turaqtaityn jerdi sonda kóshirý. Ekinshisi, shekaradan ótetinderdi basqa keden beketine aýystyrý. Óitkeni, «Jibek joly» keden beketi eldimekenderge tym jaqyn ornalasqan, qaýip týdyrýy múmkin. Eger jaǵdai osylai jalǵasa beretin bolsa, kún sýytqannan keiin olardy ustap turý óte qiyn bolady», - dedi Ómirzaq Shókeev.
