Túrkistan oblysynda biyl 34 mektep ashylady. Solardyń biri – Saryaǵash qalasy, «Samal» móltek aýdanynda salynýda. Saryaǵash aýdanynyń ákimi M.Otarshiev qurylysy aiaqtalýǵa jaqyn 900 oryndyq mekteptiń qurylysymen tanysty, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Jyl sanap bala sanynyń ósýine bailanysty №60 «Samal» jalpy orta mektebi úsh aýysymǵa ótý qaýpi týyndaǵan bolatyn. Osyǵan orai, jańa mektep ǵimaratyn salý úshin aýdan ákiminiń tapsyrmasyna sáikes jobalyq-smetalyq qujattama ázirlenip, búgingi tańda mektep ǵimaratynyń qurylysy aiaqtalýda.
Qazirgi tańda mekteptiń qurylys jumystaryn «JAŃA ARNA 2002» JShS-i júrgizýde. Jańa bilim ǵimaratynyń jalpy aýmaǵy – 2,6 gektardy quraidy. Atalǵan aýmaqta oqý korpýstary, fizika, himiia, biologiia kabinetteri, ashana sondai-aq sport alańshasy ornalasqan. Josparǵa sáikes, atalǵan bilim mekemesi biyl qazan aiynda tapsyrylmaq.
Qurylys nysanyn aralaý barysynda aýdan ákimi tiisti sala basshylaryna talap qoiyp, oryn alǵan kemshilikterdi túzetýdi tapsyrdy. Sondai-aq belgilengen kestege sáikes qurylys nysanyn el igiligine tapsyrý kerektigin aitty. Sonymen birge oqýshylardyń qaýipsizdigi úshin jańa mektep ǵimaratynda beinebaqylaý júiesin ornatý qarastyrylǵan.
Aita ketsek, búgingi tańda aýdan boiynsha 7 mekteptiń qurylysy júrgizilýde. Onyń ishinde 3 mektep biyl paidalanýǵa berilse qalǵan 4 mekteptiń qurylysy kelesi jyly aiaqtalady dep josparlanǵan.
