Premer-ministrdiń orynbasary Qanat Bozymbaev Túrkistan oblysyna jumys sapary barysynda «Tama-Tastanbek» toptyq sý qubyrynyń iske qosylý rásimine qatysty, dep habarlaidy Ult.kz.
Joba Memleket basshysynyń tapsyrmasy boiynsha Úkimettiń qoldaýymen eki jyl ishinde júzege asyryldy. Saltanatty sharaǵa Sý resýrstary jáne irrigatsiia ministri Nurjan Nurjigitov pen Túrkistan oblysynyń ákimi Nuralhan Kósherov te qatysty.
Jańa sý qubyrynyń iske qosylýy nátijesinde Shardara qalasynyń 31 myńnan astam turǵyny sapaly aýyz sýmen qamtamasyz etilip, qala Shardara sý qoimasyna táýeldilikten qutyldy.
Joba aiasynda jalpy uzyndyǵy 39,3 shaqyrym bolatyn eki magistraldyq sý qubyry, tórt taza sý rezervýary, sý tazartý qondyrǵysy, birinshi jáne ekinshi kótergish sorǵy stansalary salyndy. Sonymen qatar tereńdigi 110 metr bolatyn 14 uńǵyma burǵylanyp, 133 qudyq kamerasy ornatyldy.
Qanat Bozymbaev eldi mekenderdi sapaly aýyz sýmen qamtamasyz etý memlekettik saiasattyń basym baǵyttarynyń biri ekenin atap ótti.
«Buǵan deiin Shardara qalasynyń aýyz sýmen qamtylýy sý qoimasyndaǵy jaǵdaiǵa tikelei táýeldi boldy. Endi turǵyndar táýlik boiy «Tama-Tastanbek» jerasty ken ornynan alynatyn sapaly aýyz sýmen qamtamasyz etiledi. Bul joba óńirdegi 31 myńnan astam adamnyń ómir súrý sapasyn jaqsartyp, áleýmettik turaqtylyqty nyǵaitýǵa yqpal etedi», – dedi vitse-premer.
Sapar barysynda Qanat Bozymbaev Jetisai aýdanyndaǵy «Táýelsizdikke 20 jyl» kanalynyń №1, №2 jáne №3 sorǵy stansalaryn jańǵyrtý jumystarynyń barysymen de tanysty. Bul nysandar «Dostyq» magistraldyq kanaly arqyly sý jetkiliksiz bolǵan jaǵdaida Shardara sý qoimasynan sýdy mehanikalyq jolmen jetkizýge arnalǵan.
Joba aiasynda kanaldyń 10,1 shaqyrymy betonmen qaptalyp, onyń sý ótkizý qabileti tolyq qalpyna keltiriledi. Sonyń nátijesinde shamamen 60 myń gektar aýyl sharýashylyǵy alqabyn turaqty sýmen qamtamasyz etýge múmkindik týady.
Vitse-premer óńirdegi vegetatsiialyq kezeńniń barysymen de tanysty. Biyl Túrkistan oblysynda sý kóp qajet etetin daqyldardy egý kólemi belgilengen limitten aspaǵany aityldy. Sonyń arqasynda vegetatsiialyq kezeń turaqty ótip, «Qazsýshar» kásipornymen kelisimshart jasaǵan sharýalar sýarmaly sýmen ýaqytyly qamtamasyz etilip otyr.
Úkimettiń málimetinshe, aldaǵy ýaqytta da sý resýrstaryn tiimdi paidalaný jáne egis alqaptaryn ártaraptandyrý baǵytyndaǵy jumystar jalǵasady.
