پرەمەر-مينيستردٸڭ ورىنباسارى قانات بوزىمباەۆ تٷركٸستان وبلىسىنا جۇمىس ساپارى بارىسىندا «تاما-تاستانبەك» توپتىق سۋ قۇبىرىنىڭ ٸسكە قوسىلۋ رەسٸمٸنە قاتىستى, دەپ حابارلايدى Ult.kz.
جوبا مەملەكەت باسشىسىنىڭ تاپسىرماسى بويىنشا ٷكٸمەتتٸڭ قولداۋىمەن ەكٸ جىل ٸشٸندە جٷزەگە اسىرىلدى. سالتاناتتى شاراعا سۋ رەسۋرستارى جەنە يرريگاتسييا مينيسترٸ نۇرجان نۇرجٸگٸتوۆ پەن تٷركٸستان وبلىسىنىڭ ەكٸمٸ نۇرالحان كٶشەروۆ تە قاتىستى.
جاڭا سۋ قۇبىرىنىڭ ٸسكە قوسىلۋى نەتيجەسٸندە شاردارا قالاسىنىڭ 31 مىڭنان استام تۇرعىنى ساپالى اۋىز سۋمەن قامتاماسىز ەتٸلٸپ, قالا شاردارا سۋ قويماسىنا تەۋەلدٸلٸكتەن قۇتىلدى.
جوبا اياسىندا جالپى ۇزىندىعى 39,3 شاقىرىم بولاتىن ەكٸ ماگيسترالدىق سۋ قۇبىرى, تٶرت تازا سۋ رەزەرۆۋارى, سۋ تازارتۋ قوندىرعىسى, بٸرٸنشٸ جەنە ەكٸنشٸ كٶتەرگٸش سورعى ستانسالارى سالىندى. سونىمەن قاتار تەرەڭدٸگٸ 110 مەتر بولاتىن 14 ۇڭعىما بۇرعىلانىپ, 133 قۇدىق كامەراسى ورناتىلدى.
قانات بوزىمباەۆ ەلدٸ مەكەندەردٸ ساپالى اۋىز سۋمەن قامتاماسىز ەتۋ مەملەكەتتٸك ساياساتتىڭ باسىم باعىتتارىنىڭ بٸرٸ ەكەنٸن اتاپ ٶتتٸ.
«بۇعان دەيٸن شاردارا قالاسىنىڭ اۋىز سۋمەن قامتىلۋى سۋ قويماسىنداعى جاعدايعا تٸكەلەي تەۋەلدٸ بولدى. ەندٸ تۇرعىندار تەۋلٸك بويى «تاما-تاستانبەك» جەراستى كەن ورنىنان الىناتىن ساپالى اۋىز سۋمەن قامتاماسىز ەتٸلەدٸ. بۇل جوبا ٶڭٸردەگٸ 31 مىڭنان استام ادامنىڭ ٶمٸر سٷرۋ ساپاسىن جاقسارتىپ, ەلەۋمەتتٸك تۇراقتىلىقتى نىعايتۋعا ىقپال ەتەدٸ», – دەدٸ ۆيتسە-پرەمەر.
ساپار بارىسىندا قانات بوزىمباەۆ جەتٸساي اۋدانىنداعى «تەۋەلسٸزدٸككە 20 جىل» كانالىنىڭ №1, №2 جەنە №3 سورعى ستانسالارىن جاڭعىرتۋ جۇمىستارىنىڭ بارىسىمەن دە تانىستى. بۇل نىساندار «دوستىق» ماگيسترالدىق كانالى ارقىلى سۋ جەتكٸلٸكسٸز بولعان جاعدايدا شاردارا سۋ قويماسىنان سۋدى مەحانيكالىق جولمەن جەتكٸزۋگە ارنالعان.
جوبا اياسىندا كانالدىڭ 10,1 شاقىرىمى بەتونمەن قاپتالىپ, ونىڭ سۋ ٶتكٸزۋ قابٸلەتٸ تولىق قالپىنا كەلتٸرٸلەدٸ. سونىڭ نەتيجەسٸندە شامامەن 60 مىڭ گەكتار اۋىل شارۋاشىلىعى القابىن تۇراقتى سۋمەن قامتاماسىز ەتۋگە مٷمكٸندٸك تۋادى.
ۆيتسە-پرەمەر ٶڭٸردەگٸ ۆەگەتاتسييالىق كەزەڭنٸڭ بارىسىمەن دە تانىستى. بيىل تٷركٸستان وبلىسىندا سۋ كٶپ قاجەت ەتەتٸن داقىلداردى ەگۋ كٶلەمٸ بەلگٸلەنگەن ليميتتەن اسپاعانى ايتىلدى. سونىڭ ارقاسىندا ۆەگەتاتسييالىق كەزەڭ تۇراقتى ٶتٸپ, «قازسۋشار» كەسٸپورنىمەن كەلٸسٸمشارت جاساعان شارۋالار سۋارمالى سۋمەن ۋاقىتىلى قامتاماسىز ەتٸلٸپ وتىر.
ٷكٸمەتتٸڭ مەلٸمەتٸنشە, الداعى ۋاقىتتا دا سۋ رەسۋرستارىن تيٸمدٸ پايدالانۋ جەنە ەگٸس القاپتارىن ەرتاراپتاندىرۋ باعىتىنداعى جۇمىستار جالعاسادى.
