Biyl qabyldanǵan Ekologiia kodeksi burynǵy qujattardan ózgerek. Qazir qorshaǵan ortaǵa qatysty ózekti problemalar az emes. Aýany lastaityn kásiporyndar syndy máseleler jetkilikti. Osyndai túitkilderdi retteýge jańa kodeks kómektesedi. Sarapshylar osyndai pikir bildirdi, dep habarlaidy QazAqparat.
Alǵashqy Ekologiialyq kodeks 2007 jyly qabyldanyp, 2018 jylǵa deiin eldiń Ekologiialyq kodeksine shamamen 160 túzetý engizildi.
Praktikalyq ekologtar qaýymdastyǵynyń tóraǵasy Laýra Málikovanyń aitýynsha, burynǵy Ekologiialyq kodekstegi keibir normalar bir-birine qaishy kelgen.
Iaǵni, Ekologiialyq kodeks tujyrymdamasy qoǵam talaptaryna sáikes bolmady.
«Jańa kodeks jobasyn ázirleý 2018 jyldan bastaldy. Biz praktik ekologtardyń qaýymdastyǵy retinde buǵan belsene atsalystyq. 30-ǵa jýyq usynys jasadyq. Onyń birazy qabyldandy. Atap aitar bolsam, esep berýdi ońtailandyrý, jer ýchaskelerin bólý mehanizmin qaita qaraý jáne osy mehanizmdi memlekettik ekologiialyq saraptamanyń qorytyndysymen bailanystyrý. Bul qujat burynǵy qujattardan ózgerek. Jańa qujatqa sáikes, endi iri kásiporyndar jasyl tehnologiiany engizýge midetti. «Lastaýshy tóleidi jáne qalpyna keltiredi» qaǵidatynyń negizinde lastanýdy boldyrmaý jáne baqylaý boiynsha sharalar, sondai-aq qorshaǵan ortaǵa keltirilgen ziiannyń ornyn toltyrý úshin jaýapkershilik kózdelgen. Ekologiialyq ziian oryn alǵan jaǵdaida tabiǵat paidalanýshy qorshaǵan ortany onyń bastapqy qalypyna keltirýge midetti», - deidi sarapshy.
Sonymen qatar, ekolog ákimshilik kodekstiń aiasynda salyq kodeksine de ózgerister engizilgenin aitty.
«Qorshaǵan ortany lastaǵandarǵa salynatyn aiyppul on ese artty. Sonymen qatar, buryn kásiporyndardy prokýratýranyń ruqsatymen ǵana tekseretin bolsa, endi aýany lastaǵan kásiporyndardy buqaralyq aqparat quraldarynda jariialanǵan maqala negizinde jáne qoǵamdyq uiymnyń shaǵymy boiynsha teksere alady. Bul ókiletti memlekettik organdarǵa qorshaǵan ortaǵa zalaldy toqtatýǵa jáne shuǵyl áreket etýge múmkindik beredi. Sondai-aq, inspektorlardyń jumysyna degen halyqtyń senimin arttyrady», - deidi Laýra Málikova.
Ekobelsendi Timýr Eleýsizovtiń sózinshe, jańa ekologiialyq kodeks qorshaǵan ortany qalpyna keltirýge, lastaýshylardan tazalyqty talap etýge jáne jaýapkershilikti kúsheitý arqyly quqyq buzý faktileriniń aldyn alýǵa baǵyttalǵan.
«Jalpy, ekologiialyq kodekske ózgerister engizilgeni jaqsy boldy. Bul qujat arqyly kóptegen halyqaralyq kelisimderge jaqyndadyq», - deidi Timýr Eleýsizov.
Ulttyq kásibi ekologiialyq aýditorlar palatasynyń prezidenti Miras Baiseiitovtyń pikirinshe, qabyldanǵan jańa ekologiialyq kodeks áli de jetildirýdi qajet etedi.
«Ekologiialyq aýdittiń kodeksten alynyp tastalýy senimdi ekologiialyq aqparattyń joǵalýyna ákelýi múmkin. Mysaly, eski nusqada mindetti ekologiialyq aýdit degen uǵym bolǵan. Endi zańdy aýdit tujyrymdamasy alynyp tastaldy. Osylaisha, biz barlyq kásiporyndar men tabiǵi resýrstardy paidalanýshylarǵa nemese jai ónerkásiptik kásiporyndarǵa memlekettik baqylaýdy joǵalttyq. Mindetti ekologiialyq aýdit júrgizgen kezde ekologiialyq aýditor ekologiialyq esep jasap, keiin ekologiia komitetine jiberetin.Qazir ekologiialyq aýditorlardyń sany kúrt tómendedi. Ekologiialyq aýditorlyq uiymdar mamandardy qysqartýǵa májbúr bolady, osylaisha jumyssyzdyq oryn alady. Jańa qujatta erikti aýdit uǵymy engizildi. Men kásipkerler ekologiialyq aýditke óz erkimen júginedi dep oilamaimyn. Iaǵni, biz senimdi ekologiialyq aqparat ala almai qalamyz. Jańa ekologiialyq kodeksti ázirleý úshin, meniń oiymsha, kem degende 2-3 jyl qajet. Sondyqtan jańa ekologiialyq kodeksti áli de jetildirý kerek», - dedi Miras Baiseiitov.
