Avtomobil biznes salasynyń sarapshylary ýtilizatsiialyq alymnyń azaiýyna qatysty pikir bildirdi, dep habarlaidy QazAqparat.
Almatyda ótken arnaiy baspasóz máslihatynda «Astana Motors» bas direktory Beknur Nesipbaev ýtil alymynyń tómendeýi syrttan importtalatyn kólik baǵasynyń az da bolsa arzandaýyna yqpal etetinin aitty.
Al ózimizde qurastyrylatyn kólikterge onyń qatysy joq.
«Eger ýtil alym tómendese BMW, MINI, Subaru, Haval, Chery kóliginiń baǵasy arzandaýy kerek. Bul ýtil alym 50 paiyzǵa túsken kúni iske asyrylady. Alaida dollar kýrsyn eskergenimiz jón, teńgeniń quldyraýy, logistika bári kólik baǵasynyń ósýine ákeledi. Iaǵni qazirgi kólik baǵasy aldaǵy ýaqytta da saqtalady dep aita almaimyz», - dedi ol.
Onyń aitýynsha, ýtilizatsiialyq alym Hyundai Trans Kazakhstan zaýytynda shyǵarylatyn Hyundai jeńil avtokólikteriniń, sondai-aq Hyundai Trans Almaty zaýytynda óndiriletin Hyundai, MAZ kommertsiialyq kólikteri men Golden Dragon jolaýshylar kólikteriniń qunyna áser etpeidi, óitkeni tutynýshylar ol úshin ýtil alym tólemeidi.
«Aita ketsek, bizdiń Hýndai Trans Qazaqstan zaýytyna ROP buǵan deiin biz tólegen 29,2 mlrd teńgeni qaitaryp berdi. Olar buny ne úshin sýbsidiia dep aitqanyn biz bilmeimiz. Ózimiz shyǵaryp jatqan kóliktiń baǵasy qymbattamaidy, al import kólikterdiń baǵasy dollar kýrsyna bailanysty ózgerip otyrady», - dedi Beknur Nesipbaev.
Qazaqstan avtomobil biznesi qaýymdastyǵynyń strategiialyq damý jónindegi direktory Qairat Elamanov Kia, Hyundai, Chevrolet, Lada, Jac siiaqty otandyq kólikter ýtilizatsiialyq alymǵa jatpaitynyn túsindirdi.
«Dál osy brendter halyqty qoldaýǵa baǵyttalǵan jeńildetilgen avtonesie baǵdarlamasyna qatysady. Sondai-aq, bul avtomobilder naryqtyń 75 paiyzyn jabady. Iaǵni, bul V jáne S sanattaryna kiredi. Bul halyq arasynda eń tanymaly. Qazir Qazaqstanda jeńil jáne kommertsiialyq kólikter shyǵaratyn 8 avtomobil zaýyty bar. Sondai -aq aýylsharýashylyq tehinikalaryn shyǵaratyn taǵy 8 zaýyt jumys isteidi. Demek, importtyq brendterdi aitpaǵanda, óndirýshiler arasynda da básekelestik bar», - dedi ol.
«Viraj» kompaniiasynyń bas direktory Ermek Eskergenov otandyq kólikterdiń baǵasy arzandamaitynyn basa aitty.
«Qazaqstanda shyǵarylatyn kólikterdiń baǵasy tómendemeidi. Al biz ákeletin kólikterdiń quny ýtil alymyna bailanysty bolady. Mysaly, keibir kólikter úshin ýtil alymy 2 mln teńge bolsa, onda ol 1 mln teńgege ainalady. Iaǵni, baǵasy bir millionǵa tómendeidi. Agrotehnologiiada da solai. Barlyǵyn Qazaqstanda óndirip jatqan joqpyz. Ishinara qoldanylatyn ádis bar. Biz olardy importqa shyǵaryp, salyqtaryn tólep otyrmyz. Barlyǵyn zańdy túrde atqaramyz», - dedi ol.
