Whiteshield Partners konsalting kompaniiasynyń menedjeri Dmitrii Galitskii Álemdik ekonomika jáne saiasat institýtymen birlese júrgizilgen Qazaqstannyń ekonomikasyna qatysty zertteý nátijesi týraly aityp berdi, dep habarlaidy QazAqparat.
«Qazaqstannyń turaqtylyǵy men makroekonomikalyq júiesine eleýli yqpal etetin birneshe aspekti bar. Birinshiden, shikizatqa táýeldilik biýdjet kirisin qubylmaly etip otyr. Shyn máninde, biýdjet kirisiniń jartysy shikizattyq emes sektormen qalyptasady. Osy arqyly shyǵystar turǵysynda teńgerimsizdik deńgeii oryn alady», - dep toqtaldy D. Galitskii zertteý nátijelerin tanystyrý barysynda.
Onyń aitýynsha, munaiǵa degen jahandyq suranystyń joǵary deńgeii 2030-2035 jyldarǵa tiesili bolady, odan keiin suranys birtindep tómendei bastaidy. Bul turǵyda Qazaqstanda ekonomikadaǵy qaita qurý sharalaryn iske asyrýy úshin 10-15 jyl ýaqyt bar.
«Biz osy zertteýdi koronavirýs pen munai baǵasynyń quldyraýyna bailanysty oqiǵaǵa deiin bastaǵan edik. Sondyqtan qazirgi jaǵdaidy nazarǵa alar bolsaq, munaiǵa suranystyń joǵary kezeńi jaqyndai túsýi múmkin. Sáikesinshe, qurylymdyq ózgeristerdiń qajettigi artyp keledi», - dedi sarapshy.
Osy oraida ol eldiń jalpy biýdjetinde shikizattyq kiristiń kólemi joǵary bolýyna bailanysty qubylmaly kórsetkishter bolatynyn eske saldy. Bul turǵyda biýdjettiń kiristeri men shyǵystaryn josparlaýda keibir qiyndyqtar oryn alady.
